KMC YAICHAPA SINGIDA FOUNTAIN GATE 1-0 CHAMAZI

BAO pekee la mchezaji wa Kimataifa wa Somalia, Ibrahim Elias dakika ya 21 limeipa KMC ushindi wa 1-0 dhidi ya Singida Fountain Gate katika mchezo wa Ligi Kuu ya NBC Tanzania Bara leo Uwanja wa Azam Complex, Chamazi Jijini Dar es Salaam.
Kwa ushindi huo, KMC inafikisha pointi 36 katika mchezo wa 28 na kusogea nafasi ya tano ikizidiwa pointi mbili na Coastal Union ambayo pia ina mechi moja mkononi, wakati Singida Fountain Gate inabaki na pointi zake 30 za mechi 28 nafasi ya 12.
Ikumbukwe timu mbili za mwisho katika ligi hiyo ya timu 16 zitashuka Daraja na mbili zitakazomaliza nafasi ya 13 na 14 zitamenyana baina yao na mshindi wa jumla atasalia Ligi Kuu, wakati timu itakayofungwa itakwenda kucheza na timu ya Championship kujaribu tena kubaki Ligi Kuu.

Friday, May 17, 2024