SHAURI AMTWANGA KO MGANDA, ATWAA TAJI LA IBF AFRIKA

Girish Khetia wa Bidco Oil Limited (kulia), akimvalisha Shauri mkanda wa ubingwa wa IBF Afrika, baada ya kumpiga Kizito (kulia)

Na Mahmoud Zubeiry

BONDIA Ramadhan Shauri wa Tanzania, usiku huu amefanikiwa kutwaa ubingwa wa Afrika wa Shirikisho la Ndondi la Kimataifa (IBF), baada ya kumpiga kwa Technical Knockout (TKO) raundi ya nane, Sunday Kizito wa Uganda katika pambano lililokuwa la raundi 12, ukumbi wa Diamond Jubilee, Dar es Salaam.

Baada ya kuokolewa kwa kengele kufuatia kipigo kikali kuanzia raundi ya saba, Kizito aliporejea kwenye kona yake ya bluu, alifikia kuangukia magoti, akishindwa kujimudu hadi aliposaidiwa na wasaidizi wake ambao walimuinua mikono juu kuashiria hawezi kuendelea na pambano.

Awali, Kizito alionyesha upinzani mkali kwa Mtanzania huyo kuanzia raundi ya kwanza hadi ya nne, lakini taratibu mambo yalianza kumgeukia kuanzia raundi ya tano. Mikono miepesi ya Shauri iliyokuwa ikichomoka kwa haraka na kutua kwenye kichwa cha Kizito, ilikwenda ikimlainisha taratibu Mganda huyo na kufikia raundi ya nane, haikuwa ajabu alipotandikwa kama begi.

Shauri alipigana kwa kiwango cha juu na kuashiria kwamba, taifa limempata shujaa mpya wa ndondi wa uzito wa Feather ambaye anaweza kufanya makubwa, kama atapewa sapoti ya kutosha.

Pambano hilo liloandaliwa na Kitwe Promotions na kudhaminiwa na Bidco Oil Limited, chini ya usimamizi wa Kamisheni ya Ngumi za Kulipwa Tanzania (TPBC) lilitanguliwa na mapambano mengine kadhaa na Mtanzania mwingine, Nassib Ramadhan alimpiga kwa TKO raundi ya kwanza, dakika ya kwanza sekunde ya 40, Mkenya Isaac Odhiambo katika pambano la uzito wa Super Fly, lililokuwa la raundi nane.

Ramadhani Mashudu alimpiga Ramadhani Mkundi kwa pointi za majaji wote watatu, katika pambano la raundi sita uzito wa Bantam, wakati Yonas Segere alimpiga kwa pointi za majaji wawili kwa mmoja, Seba Temba katika uzito wa Super Light, raundi sita pia na Bakari Mohamed alimpiga Bakari Maulid kwa pointi za majaji wawili kwa mmoja, uzito wa Feather, raundi nne.

Kwenye ukumbi wa Chuo cha Uhasibu, Kurasini, lilifanyika pambano lingine la uzito juu na Alphonce Mchumia Tumbo alimtandika TKO, raundi ya kwanza, dakika ya kwanza sekunde ua 49, David Mrope ‘Zola D’.