NGASSA ANACHOFANYA NI UTOTO TU

Na Mahmoud
Bin Zubeiry

MRISHO Khalfan Ngassa anatafutwa ili ahusishwe katika mpango wa kuuzwa kwake klabu ya El Merreikh ya Sudan, lakini hapatikani na simu kazima.

Wakati huo huo, Kamati ya Sheria, Maadili na Hadhi za Wachezaji ya Shirikisho la Soka Tanzania (TFF), chini ya Mwenyekiti wake, Wakili Alex Mgongolwa, inatarajiwa kukutana leo mjini Dar es Salaam kujadili uhalali wa kuuzwa kwa mchezaji huyo.

Hiyo inafuatia awali kutokea mgogoro baina ya klabu yake kisheria, Azam FC na Simba SC alikopelekwa kwa mkopo kuhusu uhalali wa kuuzwa kwake.

Azam wakiwa wamemtoa kwa mkopo Ngassa, walilalamikiwa na Simba SC kumuuza Merreikh mchezaji huyo bila kuwashirikisha wao.

Simba walikuwa wana hoja ya msingi na ndiyo maana busara imetumika, klabu hizo mbili zimeketi meza moja na kumaliza suala la mchezaji huyo.  

Maana yake, Kamati ya Mgongolwa itakutana kutatua kesi nyepesi tu baada ya Simba SC na Azam FC kufikia makubaliano ya kumuuza kwa pamoja mshambuliaji huyo kwenda El Merreikh ya Sudan.

Suluhu hiyo inakuja baada ya Merreikh kuongeza dau la kumnunua Ngassa kutoka dola za Kimarekani 70,000 hadi 100,000, zaidi ya Sh. Milioni 150 za Tanzania.

Baada ya kuongeza dau hilo, Azam ilikutana na Simba kujadili pamoja ofa hiyo mpya na kukubaliana kumuuza na kugawana nusu kwa nusu.

Upande wa Azam uliwakilishwa na mmoja wa Wakurugenzi wa bodi ya klabu hiyo, wakati kwa Simba waliwakilishwa na Makamu wao Mwenyekiti, Geoffrey Nyange ‘Kaburu’.

Upande wa maslahi ya mchezaji umeboreshwa pia, Ngassa sasa atapewa dola za Kimarekani 75,000 zaidi ya Sh. Milioni 120,000 kwa kusaini mkataba wa miaka miwili na mshahara utabaki kuwa dola 4,000 (Sh. Milioni 6).

Habari zinasema kwamba, baada ya makubaliano hayo, jana Simba na Azam walisaini mkataba wa kumuuza rasmi mchezaji huyo.

Hata hivyo, tangu wakati kikao hicho kinaendelea jioni ya juzi, Ngassa alikuwa akitafutwa ili kuhusishwa, lakini hakupatikana kwenye simu.

Wasiwasi umeibuka kwamba huenda Ngassa anaweza akawa ameghairi mpango wa kwenda Merreikh kutokana na ushauri mbaya wa watu wake wa karibu na mchezaji mmoja wa timu ya taifa, alisema wiki hii kwamba Ngassa anafikiria kuachana na mpango wa kucheza Sudan, kwa sababu anasikia ni nchi ya Kiislamu na haina starehe.

Ilipofikia Ngassa anahitaji ushauri nasaha, kwani nafasi aliyopata ni adimu na ni muhimu kwa taifa na hata kwa maslahi yake binafsi.

Achilia mbali maslahi mazuri, lakini anakwenda kucheza timu ya ushindani ambayo itakuza kiwango chake aweze kuisaidia timu ya taifa pia. Merreikh ni timu ambayo karibu kila mwaka inashiriki Ligi ya Mabingwa.

Ikumbukwe, Azam walimtoa kwa mkopo Ngassa mwanzoni mwa Agosti, mwaka huu baada ya kukerwa na kitendo cha mchezaji huyo kubusu jezi ya timu yake ya zamani, Yanga, katika Nusu Fainali ya Klabu Bingwa Afrika Mashariki na Kati, Kombe la Kagame, dhidi ya AS Vita ya Jamhuri ya Kidemokrasia ya Kongo (DRC).

Alifanya hivyo, baada ya kufunga bao la ushindi akitokea benchi na kuiwezesha Azam kutinga fainali ya michuano hiyo, ambako walifungwa na Yanga 2-0, naye kwa mara nyingine akitokea benchi na kushindwa kufunga, hivyo kutuhumiwa kucheza kinazi.

Ilielezwa kwamba Simba walitoa Sh. Milioni 25 kumnunua kwa mkopo mchezaji huyo, ingawa baadaye Simba wakasema waliununua mkataba wa mwaka mmoja aliobakiza mchezaji huyo Azam FC, nao wakamuongezea wa mwaka mmoja kwa kumsainisha kwa Sh. Milioni 30, kati ya hizo Milioni 12 akipewa taslimu na 18 akipewa gari.

Vema Simba na Azam wamemalizana. Nilikuwa nafuatilia sakata la Ngassa kuuzwa kwake, tangu mwanzoni, nilipokuwa Uganda kwenye Kombe la Mataifa ya Afrika Mashariki na Kati, CECAFA Tusker Challenge.

Nikiwa huko, nilizungumza na Ngassa baada tu ya kuibuka habari hizo, akasema ni kweli na yeye amekwishakubaliana na Merreikh kuhusu maslahi yake binafasi na kilichobaki ni klabu hiyo kongwe ya Sudan kumalizana na klabu zake.

Lakini ajabu sasa, baada ya klabu zake kumalizana, yeye anakimbia kuhusishwa. Jana alikaririwa na kituo kimoja cha Radio akisema anakwepa kwa sababu Simba na Azam zinataka kumuuza kama mzigo, bila kumhusisha na hajui chochote.

Kwanza hili si kweli- Ngassa anajua hili dili vema, kwa sababu Waandishi wengine wa Tanzania walizungumza naye pia Uganda na akatoa ufafanuzi mzuri tu.

Lakini hata tukisema tukubaliane na Ngassa kwa anachosema, hajui- inakuwaje sasa anaitwa kushirikishwa hapatikani?

Kama kipo kitu Ngassa anahitaji juu ya ile ofa iliyotolewa kwake Merreikh, vema angeibuka kukutana na klabu zake, akatoa dukuduku lake, lakini kujificha si jibu na ni utoto.

Hakuna sababu ya Ngassa kusumbua vichwa vya watu wazima, kama suala ni maslahi haridhishwi nayo atoe pendekezo lake, na kama Merreikh wakishindwa biashara ife.

Merreikh ni klabu kubwa, ambayo ina uwezo wa kusajili mchezaji yoyote barani Afrika inayemtaka, Ngassa anatakiwa kujua hilo.

Merreikh ni heshima kwa Ngassa na nafasi zaidi ya kukuza kiwango chake kwa kucheza mashindano makubwa, kama ilivyo kwa wenzake Mbwana Samatta na Thomas Ulimwengu ambao tumewashuhudia mwaka huu wakicheza hatua ya makundi ya Ligi ya Mabingwa Afrika na klabu yao, TP Mazembe ya Jamhuri ya Kidemokrasia ya Kongo (DRC).

Lakini pia maslahi ya kule ni makubwa mno, mbali na mshahara wa Sh. Milioni 6, kule kuna bonasi nyingi mno anapocheza na kufanya vizuri katika mashindano, hususan ya Ligi ya Mabingwa.

Kila bao atakalofunga Ngassa katika Ligi ya Mabingwa ni fedha kwake. Kila mechi watakayoshinda au kutoa sare, Ngassa anaingiza fedha. Lakini pia, Ngassa anajiweka sokoni zaidi kwa kucheza kule, kwani atakuwa akionekana akicheza Ligi ya Mabingwa kila msimu na kujitengenezea mazingira ya kutimiza ndoto zake za muda mrefu, kucheza Ulaya.  

Sijui nielezee nini katika hili, maana inafikia wakati nashindwa kuelewa kilicho nyuma ya Ngassa katika sakata hili, kama ni ujinga au weledi zaidi.

Hizi habari za kwamba hataki kwenda Sudan kwa sababu hakuna starehe, kwanza sitaki kuziamini sana, lakini hata kama ni kweli pia, Ngassa anataka kustarehe kwa kiwango gani zaidi ya kufanya kazi kwa sasa ili kujiandalia maisha yake ya baadaye akistaafu soka?

Wachezaji wakubwa waliocheza Ulaya kama Celestine Babayaro aliyewika Cheslea, sasa analia hali ngumu ya kiuchumi, miaka michache tangu astaafu, je Ngassa anaingaliaje kesho yake?

Nani mshauri wa Ngassa kwa sasa. Nitafurahi nikijua baadaye, Ngassa alikuwa anakwepa dili ya Merreikh ili akamate dili nyingine ya maana ya maslahi mazuri kuliko hiyo, lakini ikija kuwa ni upuuzi, kwa kweli nitakuwa sehemu ya Watanzania watakaoanza kumdharau Mrisho.

Yote kwa yote, Mrisho ni mtu mzima mwenye akili zake timamu, ambaye anapaswa kujiamini na kuwa wazi, kuliko kuwa na kauli mbilimbili. Sitaki kuamini eti Azam wana shida ya fedha kiasi cha kutaka kumuuza Ngassa bila ridhaa yake. Na sitaki kuamini Simba wanataka fedha kuliko Ngassa mwenyewe. 

Lakini sioni kama ni vema kwa Ngassa kuibuka na kutoa kauli ambazo zina mwelekeo wa kuwachafulia majina Wakurugenzi wa Azam. Ngassa ana mkataba na Azam, yupo kwa mkopo Simba SC, ambao ameuongezea mkataba wa mwaka mmoja. Hayo yako wazi.

Hata ajifiche vipi, mwisho wa siku, atatakiwa kuripoti kituo chake cha kazi, Simba SC na asipofanya hivyo, mamlaka za soka zinaweza kuidhinisha adhabu itakayotolewa dhidi yake. 

Hakuna mchezaji duniani anaweza kuuzwa bila ridhaa yake- hata kama awe mzigo kwenye klabu, ataendelea kukaa benchi akila manufaa ya mkataba wake, hata Ngassa anaweza kusema hataki kuuzwa ili autumikie mkataba wake hadi uishe. Sasa kwa haya yote, Ngassa anajificha ili iweje kama si utoto tu? Tujadili waungwana.

Wednesday, December 12, 2012