BREAKING NEWS: KOCHA MPYA YANGA HUYU HAPA, NI BEKI WA ZAMANI WA TIMU YA TAIFA UHOLANZI ALIYEWEKA REKODI KOMBE LA DUNIA

Brandts kulia akiwa na Saintfiet wakati wa Kagame

Na Mahmoud Zubeiry

BEKI wa zamani wa kimataifa wa Uholanzi na klabu ya PSV Eindhoven ya Holanzi, Ernstus ‘Ernie’ Wilhelmus Johannes Brandts, ndiye kocha mpya wa Yanga na atawasili wakati wowote kuanzia kesho kusaini mkataba na kuanza kazi.

Mholanzi huyo aliyefukuzwa APR ya Rwanda baada ya Klabu Bingwa Afrika Mashariki na Kati, Kombe la Kagame, Agosti mwaka huu amepewa ukocha wa Yanga, baada ya Mbrazil Marcio Maximo kukataa nafasi hiyo kwa mara ya pili.

Mtaalamu huyo, alizaliwa Februari 3, mwaka 1956 mjini Nieuw-Dijk, Gelderland, mbali na PSV Eindhoven, alichezea pia Roda JC Kerkrade, MVV Maastricht na De Graafschap.

Brandts aliichezea mechi 28 timu ya taifa ya Uholanzi na kuifungia mabao matano na pia alicheza Fainali za Kombe la Dunia mwaka 1978.

Katika fainali hizo, Raundi ya pili kwenye mechi na Italia, aliweka rekodi ya kuwa mchezaji pekee aliyezifungia mabao timu zote katika mechi moja kwenye fainali za Kombe la Dunia.

Alianza kujifunga dakika ya 18, kisha akaisawazishia Uholanzi dakika ya 50 katika mechi ambayo, mchezaji mwenzake Arie Haan baadaye aliifungia timu yake bao la ushindi na kutoka kifua mbele kwa mabao 2–1.

Alipostaafu soka akawa kocha na katikati ya msimu wa 2007–2008, Brandts aliambiwa hataongezewa mkataba NAC-Breda, licha ya matokeo mazuri ya kushika nafasi ya tatu katika Ligi Kuu Uholanzi (Eredivisie), ingawa uamuzi huo haukuwafurahisha mashabiki wa timu hiyo na nafasi yake akapewa Robert Maaskant kuanzia msimu wa 2008–2009.

Akateuliwa kuwa Kocha wa Rah Ahan mwaka 2009, kabla ya kufukuzwa Desemba 2009 na kuibukia APR ya Rwanda mwaka 2010, ambako ‘riziki’ yake imeisha miezi miwili iliyopita na sasa amepata maisha mapya Yanga.

Akiwa APR, Brandts alifungwa mechi zote mbili na Yanga iliyokuwa ikifundishwa na Mbelgiji Tom Saintfiet katika Kombe la Kagame, moja ya makundi 2-0 na nyingine ya Nusu Fainali 1-0. Yanga iliibuka bingwa, ikiifunga Azam FC 2-0 kwenye fainali.

Brandts atakutana na wachezaji wake wa zamani wawili Yanga, beki Mbuyu Twite anayeanza msimu wa kwanza katika klabu hiyo na kiungo Haruna Niyonzima anayeingia katika msimu wa pili, ambao alifanya nao kazi APR. 

WASIFU WAKE
JINA KAMILI	Ernstus Wilhelmus Johannes Brandts
KUZALIWA	3 February 1956 (age 56)
ALIPOZALIWA	Nieuw-Dijk, Gelderland
UREFU	1.81 m (5 ft 11 1⁄2 in)
NAFASI ALIYOCHEZA	Beki (amestaafu)
KLABU MPYA
2012	Yanga SC
TIMU ZA VIJANA
	De Sprinkhanen (Nieuw-Dijk)
TIMU ZA WAKUBWA
Mwaka	Timu	Mechi†	(Mabao)†
1974–1977	De Graafschap	38	(2)
1977–1986	PSV Eindhoven	251	(23)
1986–1989	Roda JC	68	(4)
1988–1989	MVV Maastricht	16	(0)
1989–1991	K.F.C. Germinal Beerschot	59	(5)
1991–1992	De Graafschap	20	(0)
TIMU YA TAIFA
1977–1985	Uholanzi	28	(5)
TIMU ALIZOFUNDISHA
1993–2002	PSV Eindhoven (timu ya vijana na msaidizi)
2002–2004	RKSV Nuenen
2005–2006	FC Volendam
2006–2008	NAC Breda
2009	Rah Ahan
2010–	APR FC

Thursday, September 27, 2012