HABARI MOTOMOTO

HABARI ZA NYUMBANI

HABARI PICHA

HABARI ZA KIMATAIFA

HABARI ZA AFRIKA

MAKALA

LIGI YA MABINGWA ULAYA


LA LIGA


MAKTABA YA BIN ZUBEIRY

LIVERPOOL YATINGA FAINALI EUROPA LEAGUE BAADA YA KUIPIGA 3-0 VILLARREAL

Mshambuliaji wa kimataifa wa England, Daniel Sturridge akishangilia bao lake na nyota wa Brazil, Philippe Coutinho na Firmino katika ushindi wa 3-0 wa Liverpool dhidi ya Villarreal kwenye mchezo wa marudiano wa Nusu Fainali ya Europa League usiku wa Alhamisi Uwanja wa Anfield. Mabao mengine ya Liverpool yamefungwa na Bruno Soriano na Adam Lallana na sasa Wekundu hao wa Anfield wanasonga mbele kwa ushindi wa jumla wa 3-1 baada ya wiki iliyopita kufungwa 1-0 Hispania na watakutana na Sevilla katika fainali mjini Basel Mei 18 

MCHAKATO WA MAREKEBISHO YA KANUNI LIGI KUU WAANZA

Na Mwandishi Wetu, DAR ES SALAAM
BODI ya Ligi Kuu ya Vodacom Tanzania Bara imeziomba klabu kuwasilisha maoni kwa ajili ya marekebisho ya kanuni za ligi hiyo.
Bodi hiyo pamoja na kuzipongeza timu za Ligi Kuu Tanzania Bara kwa kushiriki na kufanya msimu wa Ligi Kuu Bara kuwa ya Vodacom 2015/16 kuwa wenye mafanikio, imezifahamisha klabu zitakazoshiriki Ligi Kuu ya Vodacom msimu wa 2016/17 juu ya mchakato wa wa utengenezaji kanuni umeanza.
"Bodi ya Ligi kwa sasa inakaribisha maoni, mapendekezo, marekebisho kutoka klabu ili kuboresha uendeshaji wa ligi. Maoni hayo yanapokelewa kwa njia ya maandishi moja kwa moja kwenye ofisi za bodi au kwa njia ya barua pepe tplb.tplb@yahoo.com,"imesema taarifa ya Bodi kupitia TFF (Shirikisho la Soka Tanznaia).

Katika hatua nyingine, timu ya Azam FC ya Dar es Salaam, imenyang'anywa ushindi wa pointi tatu na mabao matatu uliyoupata katika mechi Na. 156 ya Ligi Kuu ya Vodacom Tanzania Bara dhidi ya Mbeya City.
Uamuzi huo umetokana na Azam kumtumia mchezaji Erasto Nyoni kwenye mechi hiyo wakati akiwa na kadi tatu za njano. Mchezo huo ulifanyika Uwanja wa Kumbukumbu ya Sokoine jijini Mbeya.
Kitendo hicho ni kinyume na Kanuni ya 37(4) ya Ligi Kuu Toleo la 2015 inayoelekeza kuwa mchezaji atakayeonywa kwa kadi ya njano katika michezo mitatu hataruhusiwa kucheza mchezo unaofuata wa timu yake. Hivyo kwenda kinyume na Kanuni husika.
Kwa kuzingatia Kanuni ya 14(37) ya Ligi Kuu Toleo la 2015, timu ya Mbeya City imepewa ushindi wa pointi tatu na mabao matatu.
Kadhalika Bodi ya Ligi imelionya Benchi la Ufundi la timu hiyo kuongeza umakini katika utunzaji wa kumbukumbu za kadi za wachezaji wake. Pia imezikaribisha timu zote wakati wowote kuomba kumbukumbu zozote kila zinapozihitajika. 

SHUGHULI YA FARID MUSSA KATIKA MCHEZO WA KIRAFIKI JANA

Winga wa kimataifa wa Tanzania, Farid Mussa malik (kulia) akiichezea Deportivo Tenerife mchezo wa kirafiki jana klabu hiyo ya Daraja la Kwanza Hispania katika majaribio yake ya mwishio kabla ya kuambiwa amefuzu
Farid Mussa (kulia) akimtoka mchezaji wa timu iliyomenyana na Tenerife jana
Farid Mussa chini akipmabana vikali jana katika mchezo huo
Farid Mussa akipasua katikati ya wachezaji wa timu pinzani jana
Beki wa wapinzani akienda juu kuokoa mpira dhidi ya mchezaji hatari kutoka Tanzania
Farid Mussa (kulia) akiytafuta maarifa ya kumpokonya mpira beki wa wapinzani jana

FARID MUSSA AFAULU MAJARIBIO HISPANIA, DEPORTIVO TENERIFE WAJA MEZANI AZAM FC

Na Mahmoud Zubeiry, DAR ES SALAAM
WINGA wa kimataifa wa Tanzania, Farid Mussa Malik (pichani kulia) wa klabu ya Azam ya Dar es Salaam amefaulu majaribio katika klabu ya Deportivo Tenerife ya Ligi Daraja la Kwanza nchini Hispania.
Mkurugenzi wa Azam FC, Yussuf Bakhresa anayefuatilia majaribio ya mchezaji huyo Hispania, ameiambia BIN ZUBEIRY SPORTS – ONLINE kwamba CD Tenerife sasa inatarajiwa kuingia katika mazungumzo na Azam FC juu ya kumnunua mchezaji huyo.
“Tunatarajia kuanza mazungumzo nao juu ya suala la Farid, ingawa wazo lao la awali ni kumchukua kwa mkopo wa miaka miwili. Sasa tunasubiri ofa yao rasmi, kisha Bodi ya Ukurugenzi itajadili na kutoa maamuzi,”amesema Bakhresa.
Kwa upande wake, Farid amefurahia matokeo hayo na kusema haikuwa kazi nyepesi kwake kuweza kuwaridhisha maofisa wa benchi la ufundi la Tenerife.



“Kwa kweli nimefurahi sana na ninamshukuru Mungu kwa kufuzu majaribio, ila haikuwa kazi nyepesi, mpira wa Ulaya mgumu,”amesema.
Awali, Farid ilikuwa apelekwe moja ya klabu za Ligi Kuu ya Hispania, maarufu kama La Liga, kati ya Las Palmas na Athletic ya Bilbao kwa majaribio, lakini wakala wake akashauri mchezaji huyo aanzie timu ya Daraja la Kwanza Hispania ili kupata nafasi ya kucheza na kuinuka haraka.

STEWART HALL AAAGA AZAM FC IKIKATWA POINTI 'KIMIZENGWE'

AZAM FC imekatwa pointi tatu na mabao matatu iliyovuna katika mchezo wa Ligi Kuu ya Vodacom Tanzania Bara dhidi ya Mbeya City Februari 20, mwaka huu Uwanja wa Sokoine mjini Mbeya.
Hiyo inafuatia madai ya kumtumia beki Erasto Edward Nyoni katika mchezo akiwa ana kadi tatu za njano.
Ofisa Habari wa Shirikisho la Soka Tanzania (TFF), Alfred Lucas Mapunda amesema kwamba pamoja na kupokwa pointi hizo, benchi la Ufundi la Azam FC limepewa onyo kuwa makini na taarifa za wachezaji wake.
Kwa kukatwa pointi hizo, Azam FC sasa inabakiwa na pointi 57 baada ya kucheza mechi 27 na kuporomoka kwa nafasi moja hadi ya tatu, wakiipisha Simba SC yenye pointi 58 za mechi 26, huku Yanga yenye pointi 68 za mechi 27 ikiendelea kuongoza ligi hiyo.
Katika hatua nyingine, kocha wa Azam FC Muingereza Stewart John Hall amesem ataondoka katika klabu hiyo baada ya kumaliza msimu.
Stewart amesema anamalizia mechi tatu za Ligi Kuu na Fainali ya Kombe la Shirikisho la Soka Tanzania (TFF), maarufu kama Kombe la Azam Sports Federation (ASFC) na baada ya hapo ataondoka.

WAGHANA KUCHEZESHA YANGA NA WAANGOLA TAIFA JUMAMOSI

Na Prince Akbar, DAR ES SALAAM
MAREFA wa Ghana watachezesha mechi ya kwanza ya mchujo wa kuwania kucheza hatua ya makundi ya Kombe la Shirikisho Afrika Jumamosi Uwanja wa Taifa, Dar es Salaam kati ya wenyeji, Yanga dhidi ya Sagrada Esperanca ya Angola.
Hao ni Joseph Odartei Lamptey atakayepuliza filimbi akisaidiwa na washika vibendera David Laryea na Malik Alidu Salifu.
Ofisa Habari wa Shirikisho la Soka Tanzania (TFF) Alfred Lucas Mapunda amesema leo mjini Dar es Salaam kwamba Kamisaa wa mchezo huo ni Asfaw Luleseged Begashaw kutoka Ethiopia.
Kocha wa Yanga, Mholanzi Hans van der Pluijm (kulia) akiwa na Meneja, Hafidh Saleh

Mwandishi huyo wa zamani wa gazeti la Dimba amesema kwamba waamuzi watawasili leo usiku nchini, wakati Kamisaa atawasili kesho. 
Mchezo wa marudiano utachezeshwa na marefa wa Madagascar Mei 17, mwaka huu Uwanja wa Sagrada Esperanca, zamani Quintalao do Dundo na utachezweshwa .
Hao ni Hamada el Moussa Nampiandraza atakayepuliza filimbi, akisaidiwa na washika vibendera Velomanana Ferdinand Jinoro na Jean Thierry Djaonirina.
Yanga imeangukia katika kapu la kuwania kucheza hatua ya makundi ya Shirikisho, baada ya kutolewa na Al Ahly ya Misri katika hatua ya 16 Bora ya Ligi ya Mabingwa Afrika kwa jumla ya mabao 3-2, ikilazimishwa sare ya 1-1 Dar es Salaam na kufungwa 2-1 Alexandria.
Yanga ilianza vizuri tu kwa kuzitoa Cercle de Joachim ya Mauritius kwa jumla ya mabao 3-0, ikishinda 1-0 ugenini na 2-0 nyumbani kabla ya kuitoa na APR ya Rwanda kwa jumla ya mabao 3-2, ikishinda 2-1 Kigali na kutoa sare ya 1-1 Dar es Salaam.
Kwa upande wao, Sagrada Esperanca katika Raundi ya Awali waliitoa Ajax Cape Town ya Afrika Kusini kwa jumla ya mabao 3-2 baada ya kufungwa 2-1 ugenini na kushinda 2-0 nyumbani. Katika Raundi ya kwanza wakaitoa LD Maputo ya Msumbiji kwa jumla ya mabao 2-1 ikishinda 1-0 nyumbani na kutoa sare ya 1-1 ugenini na kwenda hatua ya 16 Bora, ambako waliitoa V. Club Mokanda ya Kongo kwa jumla ya mabao 4-1 wakishinda 2-1 ugenini na 2-0 nyumbani.

BEKI YANGA AKARIBIA KUSAINI BONGE LA DILI ‘MAJUU’

Na Mwandishi Wetu, DAR ES SALAAM
BEKI aliyecheza Yanga kwa muda mfupi mwaka jana, Mghana Joseph ‘Teteh’ Zuttah yuko mbioni kusajiliwa na ZweKapin United FC yenye maskani yake Burmese, Hpa-An, Myanmar. 
Na anayekaribia kufanikisha mpango wa Zuttah kusajiliwa na timu hiyo ya Ligi Kuu ya Myanmar ni wakala maarufu wa wachezaji, Gibby Kalule raia wa Uganda.
Gibby amesema alivutiwa na Zuttah alipokutana naye Tanzania na baada ya kuachwa Yanga akaamua kumuingiza katika orodha ya wachezaji wake wa kuwatafutia timu.
Joseph Zuttah (katikati) akiwa mazoeizini kwenye majaribio Myanmar
Joseph Zuttah (kushoto) akiwa na Gibby Kalule wakipata chakula hoteli 

“Nipo na Zutah hapa (Myanmar) alikuja kwa majaribio na amefanya vizuri, anakaribia kusaini Mkataba ambao atalipwa mshahara wa dola (za Kimarekani 7,000),”amesema Gibby akizungumza na BIN ZUBEIRY SPORTS – ONLINE jana.    
Zuttah aliyezaliwa Agosti 22, mwaka 1994, alitua Yanga Julai mwaka jana akitokea klabu ya Medeama ya kwao, lakini akaachwa baada ya mechi saba ndani ya mwezi mmoja.
Na Zuttah alikuwa chaguo la kocha Mholanzi wa Yanga, Hans van der Pluijm aliyemuona mchezaji huyo wakati anafundisha Ghana.
Gibby (kushoto) akiwa na mchezaji mwingine Mbrazil (anayemfuatia) ambaye amefanikiwa kumuuza Myanmar 

YANGA YAINGIA KAMBINI TIFFANY KUJIANDAA NA WAANGOLA

Kipa wa Yanga, Deo Munishi 'Dida' akiwasili na wachezaji wenzake hoteli ya Tiffany, Dar es Salaam Jumatano kuweka kambi ya kujiandaa na mchezo wa kwanza wa mchujo wa kuwania tiketi ya hatua ya makundi ya Kombe la Shirikisho la Soka Afrika dhidi ya Sagrada Esperanca ya Angola Jumamosi Uwanja wa Taifa, Dar es Salaam

NI FAINALI YA MAHASIMU WA MADRID, REAL YAITUPA NJE MAN CITY

Nyota wa Real Madrid, Gareth Bale akipiga shuti linalombabatiza beki wa Manchester City, Fernando na kuipatia timu yake bao pekee la ushindi Uwanja wa Bernabeu katika mchezo wa marudiano wa Nusu Fainali ya Ligi ya Mabingwa Ulaya. Real Madrid inatinga fainali kwa ushindi wa jumla wa 1-0 baada ya awali kutoa sare ya 0-0 mjini Manchester na sasa watakutana na mahasimu wao, Atletico Madrid Uwanja wa San Siro mjini Milan Mei 28 PICHA ZAIDI GONGA HAPA

AZAM FC WAIACHIA RASMI UBINGWA YANGA, WATOA SARE 2-2 NA JKT RUVU CHAMAZI

Na Saada Mohammed, DAR ES SALAAM
AZAM FC imepoteza kabisa matumaini ya ubingwa wa Ligi Kuu ya Vodacom Tanzania Bara, baada ya kulazimishwa sare ya kufungana mabao 2-2 na JKT Ruvu jioni ya leo Uwanja wa Azam Complex, Chamazi, Dar es Salaam.
Matokeo hayo yanamaanisha kwamba, Yanga wajitahakikishia kutetea taji hilo Mei 10 wakishinda dhidi ya Mbeya City Uwanja wa Sokoine mjini Mbeya, kwani watafikisha pointi 71 ambazo haziwezi kufikiwa na timu nyingine ya Ligi Kuu.

Sare hiyo inaifanya Azam FC ijiongezee pointi moja na kufikisha 60 baada ya kucheza mechi 27 na inaweza kumaliza na pointi 69 ikishinda mechi tatu za mwisho, wakati Simba yenye pointi 58 inaweza kumaliza na pointi 70 ikishinda mechi zake nne zilizobaki.  
Katika mchezo wa leo uliochezeshwa na refa Selemani Kinungai wa Morogoro aliyesaidiwa na washika vibendera Lulu Mushin na Shaffih Mohammed wote wa Dar es Salaam, hadi mapumziko Azam walikuwa mbele kwa mabao 2-0.
Mabao hayo yalifungwa na pacha kutoka Ivory Coast, kiungo Kipre Michael Balou dakika ya 31 na mshambuliaji Kipre Herman Tchetche dakika ya 37. 
Kipindi cha pili, JKT Ruvu inayofundishwa na gwiji wa soka nchini, Alhaj Abdallah Athumani Seif ‘King Kibadeni’ ilibadilika na kufanikiwa kusawazisha mabao yote mawili.
Alianza Saad Kipanga kufunga kwa penalti dakika ya 56 kabla ya Najim Magulu kufunga la pili dakika ya 72.
Kikosi cha Azam FC; Aishi Manula, Erasto Nyoni, Gardiel Michael, Abdallah Kheri, David Mwantika/Said Mourad dk46, Himid Mao, Kipre Balou/Khamis Mcha ‘Vialli’ dk80, Salum Abubakar ‘Sure Boy’, Mudathir Yahya/Ramadhani Singano ‘Messi’ dk64, John Bocco na Kipre Tchetche.
JKT Ruvu; Madenge Ramadhani, Hamisi Seif, Omar Kindamba, Paul Mhidze, Renatus Morris, Nashon Naftali, Abdulrahman Mussa/Samuel Kamuntu dk46, Hassan Dilunga, Najim Magulu, Mussa Juma na Saad Kipanga/George Minja dk89.

YANGA YATAKA KUFANYA UCHAGUZI KWA MATAKWA YAKE, TFF WAWE WAANGALIZI TU

Na Mwandishi Wetu, DAR ES SALAAM
BODI ya Wadhamini wa Yanga imesistiza uchaguzi wa klabu hiyo utafanyika Juni 5, mwaka huu na si Juni 25, kama ambavyo Shirikisho la Soka Tanzania (TFF) limeagiza.
Taarifa ya Bodi ya Wadhamini ya Yanga kwa BIN ZUBEIRY SPORTS – ONLINE leo imesema kwamba hawawezi kuchelewa kufanya uchaguzi kwa sasa kwa sababu mbalimbali za msingi.
Kwanza, timu ipo kwenye mashindano ya Kombe ya Afrika, Ligi Kuu ya Vodacom Tanzania Bara na Kombe la Shirikisho la Soka Tanzania (TFF), maarufu kama Kombe la Azam Sports Federation (ASFC).
Aidha, taarifa hiyo imesema kwamba viongozi wapya wa Yanga wanatakiwa kuingia madarakani mapema ili waanze kufanya usajili na kupanga mambo mengine ya msimu mpya.
Aidha, Bodi hiyo pia imepinga uchaguzi wao kusimamiwa na TFF – badala yake imeagiza usimamiwe na Kamati ya Uchaguzi ya klabu na TFF watakuwapo kama waangalizi.
“Yanga imesajiliwa kama CCM, CUF, CHADEMA lakini tofauti ni wengine wamesajiliwa kama vyama vya siasa, Yanga imesajiliwa kwa ajili ya michezo na Mamlaka ya Michezo chini ya Wizara ya Michezo na Utamaduni, na katika michezo hiyo ukiwemo mpira wa miguu, imejisajili yenyewe TFF,”. 
“Kwa maneno mengine, Yanga ingeweza kuchagua kushiriki Netiboli ingejisajili na Shirikisho la Netiboli, na au michezo mingine, kama ngumi ingejisajili Shirikisho la Ngumi, lakini kwa kujisajili kwenye soka haiwazuii kufanya mambo kwa mujibu ya Katiba yao,” imesema taarifa hiyo. 

Shabiki wa Kweli


Dhihirisha kwamba wewe ni shabiki wa kweli wa Azam FC na unaweza kupata nafasi ya kukutana na kikosi kizima cha Azam FC ikiwa ni pamoja na kutembelea uwanja wa Azam Complex, Chamazi. 

Kushiriki fuata hatua zifuatazo.
1. Like/Follow ukurasa wa NMB Tanzania katika mitandao ya Facebook, Twitter au Instagram.
2. Piga picha au chukua video ikionesha jinsi gani wewe ni shabiki wa kweli. (Picha au video ukiwa umevaa jezi au uko uwanjani ukishangilia timu yako ya Azam FC au chochote kinachoonesha wewe ni shabiki wa kweli)
3. Post picha au video hiyo kwenye akaunti yako ya Facebook, Instagram au Twitter ukitumia hashtag #ShabikiWaKweli.
4. Washirikishe marafiki ili wakupigie kura. Facebook na Instagram ni “Likes”, kwa upande wa Twitter ni “Retweets”
5. Mashabiki 10 ambao watapata "Likes/Retweets" nyingi zaidi watapata fursa pekee ya kukutana na kikosi kizima cha Azam FC

'MKWASA WA ETHIOPIA' ATUPIWA VIRAGO VYAKE

SHIRIKISHO la Soka Ethiopia (EFF) limeachana na kocha wake, Yohannes Sahle (pichani kulia) mwaka mmoja kabla hajamaliza Mkataba wake.
Hatua hiyo inafuatia matokeo yasiyoridhisha ya  Walia Antelopes huuu katika mechi za kufuzu Fainali za Mataifa ya Afrika 2017, ambako wamepoteza matumaini ya kufuzu kwa fainali hizo nchini Gabon.
"Mkataba ambao ulisainiwa Mei 1, 2015, baina ya kocha Sahle na Shirikisho umevunjwa Mei 2, 2016," imesema taarifa ya EFF.
Sahle alichukua nafasi ya Mreno, Mariano Barreto Aprili mwaka 2015, lakini ameondolewa kutokana na matokeo mabaya mechi za kufuzu AFCON na Kombe la Dunia.
Mchezaji huyo wa zamani wa kimataifa, amejikuta katika wakati mgumu baada ya Ethiopia kufungwa 7-1 na Algeria Machi mwaka huu. 
Kocha huyo mwenye umri wa miaka 49 aliiongoza Ethiopia kwenye fainali ya Kombe la  CHAN nchini Rwanda mapema mwaka huu, ambako Walia walitolewa bila kushinda hata mechi moja ya kundi lake.
Walia wakashika nafasi ya tatu kwenye CECAFA Challenge nyumbani mwezi Desemba mwaka jana. Kocha Msaidizi, Fasil Tekalegn na kocha wa makipa, Ali Redi pia wameondolewa kwenye benchi la Ufundi. 
Wakati huo huo, Shirikisho linatarajiwa kumtaja kocha mpya kwa ajili ya mchezo ujao wa kufuzu AFCON dhidi ya Lesotho mwezi Juni. 
Ethiopia ina pointi tano katika Kundi J nyuma ya vinara Algeria wenye pointi 10 na lazima washinde dhidi ya Lesotho na Shelisheli Septemba ili kujaribu kufuzu kama kama mmoja wa washindi wa pili bora.

KIPAJI KINGINE KUTOKA 'CHIMBO' LILILOMUIBUA FARID MUSSA

Beki wa pembeni wa Azam FC, Gardiel Michael Mbaga (kushoto) akiwa kwenye mazoezi ya timu yake jana Uwanja wa Azam Complex, Chamazi, Dar es Salaam kujiandaa na mchezo wa Ligi Kuu ya Vodacom Tanzania Bara jioni ya keo dhidi ya JKT Ruvu kwenye Uwanja huo. Gardiel alipandishwa msimu uliopita kutoka akademi ya klabu hiyo, pamoja na Farid Mussa Malik ambaye kwa sasa yuko kwenye majaribio ya kucheza soka ya kulipwa Hispania

MWEKA HAZINA WA ZAMANI WA CAF AFARIKI DUNIA

MWEKA Hazina wa Shirikisho la Soka Afrika (CAF), Gamal Taha (pichani kushoto) amefariki dunia akiwa ana umri wa miaka 71.
Taarifa ya Rais wa CAF, Issa Hayatou kwa BIN ZUBEIRY SPORTS - ONLINE, imesema kwamba Gamal alikuwa zaidi ya Mhasibu ndani ya shirikisho hilo.
"Gamal hakuwa tu Mhasibu wa CAF, bali pia alikuwa kiongozi mzuri ambaye alijenga misingi ya CAF kuwa taasisi inayojiendesha kisomi,"amesema Hayatou.
Akiwa anafahamika kwa jina la ‘Bw Gamal’ tu mbele ya wengi, amefariki Jumatatu Mei 2 baada ya kuugua kwa muda mfupi nchini kwao, Misri.
Alistaafu kazi CAF mwaka 2013, akihitimisha miongo miwili ya kufanya kazi za soka ya bara la Afrika alizoanza Januari mwaka 1992. Gamal ameacha mke na watoto watatu, akiwemo wa kiume Ahmed, ambaye sasa ni mfanyakazi wa CAF pia.

GUNDU GANI SIMBA! MICHUANO YA NILE BASIN NAYO YAYEYUKA

SHIRIKISHO la Soka Afrika Mashariki na Kati (CECAFA), limeahirisha michuano ya kuwania Kombe la nchi unakopita Mto Nile ‘Nile Basin Cup’.
Taarifa iliyotumwa Shirikisho la Soka Tanzania (TFF) na Katibu Mkuu wa CECAFA, Nicolas Musonye imesema kwamba wamepata taarifa za kuahirisha michuano hiyo kutoka kwa waratibu wakiwamo wenyeji Sudan.
Taarifa imesema wamekubaliana kuahirisha mpaka hapo watakapotangaza tena, hivyo Simba iliyoteuliwa na TFF kushiriki michuano hiyo, imetaarifiwa kusubiri tarehe mpya ya mashindano.

TFF YAAFIKI UCHAGUZI YANGA KUSOGEZWA MBELE

Na Mwandishi Wetu, DAR ES SALAAM
KAMATI ya Uchaguzi ya Shirikisho la Soka Tanzania (TFF) imetangaza Uchaguzi Mkuu wa Klabu ya Yanga kuwa utafanyika Juni 25, 2016 badala ya Juni 5, 2016.
Kamati ya Uchaguzi ya TFF imelazimika kufanya hivyo kwa kuzingatia ushiriki wa Yanga ambayo inashiriki michuano ya kimataifa.
Sekretarieti ya Yanga ambayo ingefanya kazi kwa pamoja na Kamati ya Uchaguzi kwa kushirikiana na TFF kwa sasa inashughulikia pia kuiandaa timu kwa ajili ya michuano ya kimataifa.

Yanga inatarajiwa kucheza na Esperanca ya Angola katika michuano ya Kombe la Shirikisho Barani Afrika Mei 7, mwaka huu kabla ya kurudiana kati ya Mei 17 na 18, mwaka huu huko Angola.
Kwa mujibu wa ratiba mpya, fomu za kuwania uongozi wa Yanga zitaanza kuchukuliwa Mei 25, 2016 na kwamba uchaguzi huo utafanyika ndani ya muda ambao Serikali kwa kupitia Baraza la Michezo la Taifa (BMT) iliagiza uchaguzi kufanyika kabla ya Juni 26, 2016 hivyo uchaguzi utafanyika ndani ya wakati.
Katiba itakayotumika ni ya mwaka 2010 na kwamba Wanachama wa Yanga watatumia kadi za kawaida za uanachama na si za benki.

SIMBA SASA WANAKUMBUKA ZAMANI TU!

HAJJI Sunday Manara ni Ofisa Habari wa Simba SC, ambaye ametoka kwenye mlango wa mahasimu wa jadi, Yanga SC.
Hajji ni mtoto wa kuzaliwa na nyota wa zamani wa Yanga, Sunday Manara enzi zake akiitwa Kompyuta.
Sunday ni mdogo wa nyota mwingine wa zamani wa Yanga, Kitwana Manara ‘Popat’ ambaye alianza kama kipa baadaye akawa mshambuliaji tishio.
Sunday ni kaka wa mchezaji mwingine wa zamani wa Yanga, Kassim Manara ambaye kama kaka yake huyo, (Baba Hajji) naye alifanikiwa kucheza Ulaya.
Lakini hakuna shaka juu ya Usimba wa Hajji, kwani waliokuwa naye Kariakoo wanasema alianza kujipambanua tangu angali mdogo, kwamba amepishana na wazazi wake katika mapenzi ya timu.

Kuzaliwa wakati baba zake wanacheza Yanga haikuwa kishawishi kwa Hajji kupenda timu hiyo ya Jangwani – yeye ni Simba, tena yule wa kulia.
Hajji amekuwa kiongozi wa Simba katika kipindi hiki kigumu, ambacho timu haifanyi vizuri na kwa nafasi yake, anajikuta anakosa cha kuzungumza kuhusu maisha ya sasa ya klabu yake.
Lakini kwa kuwa Hajji ni mzaliwa wa mjini, mwanasiasa na kada wa CCM aliyejaaliwa kipaji cha kuzungumza, basi haishiwi maneno.
Sijui kama ni kumbukumbu alizonazo kwa sababu ametokea kwenye familia ya mpira, au anakwenda Maktaba kupekua pekua, lakini kwa sasa Hajji anawakumbusha sana wapenzi wa timu hiyo makali ya timu hiyo enzi hajazaliwa, anapakatwa au anachezea magari ya kusuka kwa waya au kutengeneza kwa maboksi.
Ndiyo, Hajji leo anasimulia tukio la Simba la mwaka 1974 wakati kwanza alikuwa hajazaliwa na anaposimulia tukio la Wekundu hao wa Msimbazi, mwaka 1993 alikuwa ana umri gani?
Lakini atafanya nini ikiwa wakati huu Simba haina ambacho mpenzi yeyote wa timu hiyo ya Mtaa wa Msimbazi, Dar es Salaam atakipenda.
Kufungwa na Yanga mechi zote za msimu, ama kufungwa na Coastal Union inayoshuka daraja au kufungwa na Toto Africans ambayo wachezaji wake wamezoea kufanya kazi bila mishahara, kipi atapenda kusikia mpenzi wa Simba?
Kidogo labda tamthiliya ya ujenzi wa Bunju Complex, iliyoanza enzi Rais wa timu Alhaj Ismail Aden Rage na inaendelea wakati Rais ni Evans Elieza Aveva.
Ndiyo maana sasa Hajji anajaribu kutofautiana kidogo na viongozi wengine wa Simba ambao wanafuatilia maisha ya mahasimu wao, Yanga na kuwaombea mabaya tu, kwa kuwapa simulizi tamu wapenzi wa timu hiyo kama zile za kufika Nusu Fainali ya Klabu Bingwa Afrika 1974, kufika fainali ya Kombe la CAF 1993 na kuitoa Zamalek ya Misri katika Ligi ya Mabingwa 2003.
Kuna nini tena – na inabidi sasa wapenzi wote wa Simba wawatambie mahasimu wao, Yanga kwa historia tu. 
Kwani Yanga wamewahi kuitoa timu yoyote ya Kaskazini mwa Afrika (Waarabu) katika michuano yoyote ya Bara hili?
Au Yanga zaidi ya kufika Robo Fainali ya Kombe la Washindi 1996 na Klabu Bingwa Afrika 1969, 1970 na 1998 wana nini zaidi cha kufikia rekodi ya mahasimu wao, Simba kwenye michuano ya Bara?
Simba imefika Nusu Fainali ya Ligi ya Mabingwa mwaka 1974 na kutolewa kwa mbinde ne Mehallal El Kubra ya Misri.
Simba imefika Fainali ya Kombe la CAF mwaka 1993 na kufungwa Stellah Abidjan. Simba wamecheza mechi kikombe cha Afrika kipo Uwanja wa Taifa, Dar es Salaam kinawasubiri, bahati mbaya kikapakizwa kwenye ndege kwenda Abidjan baada ya Stella kushinda 2-0.
Yanga lini wamecheza Kombe uwanjani michuano ya Afrika. Acha Simba  wajifariji kwa historia wakati huu, maana hakuna namna tena! 

UNAANZAJE KUMSAHAU SAIDI SWEDI ‘PANUCCI’ ENZI ZAKE SIMBA SC

Beki aliyekuwa anaweza kucheza nafasi za kiungo pia, Said Swedi ‘Panucci’ wa Simba akipambana na mchezaji wa Kariakoo United ya Lindi, Chacha Kibaga katika mchezo wa Kombe la Hedex Januari 13, mwaka 2002 Uwanja wa Taifa, Dar es Salaam. Kariakoo ilishinda 3-1

UCHAGUZI YANGA, FOMU KUANZA KUTOLEWA MEI 27

Na Renatha Msungu, DAR ES SALAAM
YANGA itaanza kutoa fomu kwa ajili ya wanachama wanaotaka kuwania nafasi mbalimbali za uongozi kuanzia Mei 27 badala ya leo kama ilivyotangazwa awali na Kamati ya Uchaguzi ya Shirikisho la Soka Tanzania (TFF).
Katibu Mkuu wa Yanga, Baraka Deusdedit (pichani kushoto) amesema leo katika Mkutano na Waandishi wa Habari makao makuu ya klabu, Jangwani, Dar es Salaam, kwamba mwisho wa kuchukua na kurejesha fomu hizo utakuwa ni Mei 29.
Kiongozi huyo alisema kuwa baada ya zoezi hilo Kamati ya Uchaguzi itaanza kusikiliza pingamizi zitakazokuwa zimewasilishwa huku orodha ya mwisho ya wagombea waliopitishwa ikitarajiwa kutangazwa Juni Mosi.
Aliongeza kuwa Juni Mosi hadi 4 itakuwa ni kipindi cha kampeni kwa wagombea waliopitishwa na uchaguzi mkuu utafanyika Juni 5 kwenye ukumbi utakaotangazwa hivi karibuni.
Alisema kuwa uchaguzi huo utasimamiwa na TFF baada ya kushindwa kufanya uchaguzi tangu mwaka 2014 muda wa viongozi waliokuwa madarakani ulipomalizika.
Kufanyika kwa uchaguzi huo kutatoa nafasi kwa viongozi wapya kusimamia usajili wa wachezaji kwa ajili ya msimu ujao wa ligi na kufanya mabadiliko mengine ya katiba kwa kufuata maelekezo ya TFF.

THOMAS MULLER 'AITUPA NJE' BAYERN MUNICH LIGI YA MABINGWA

Kipa wa Atletico Madrid, Jan Oblak akiokoa mkwaju wa penalti wa mshambuliaji wa Bayern Munich, Thomas Muller katika mchezo wa marudiano wa Nusu Fainali ya Ligi ya Mabingwa Ulaya usiku wa Jumanne Uwanja wa Allianz Arena mjini Munich. Penalti hiyo ilitolewa baada ya Jose Gimenez kumchezea rafu Javi Martinez na Bayern Munich ikashinda 2-1, mabao yake yakifungwa na Xabi Alonso dakika ya 31 na Robert Lewandowski dakika ya 74, huku la wageni likifungwa na Antoine Griezmann dakika ya 53. Atletico inasonga mbele kwa faida ya bao la ugenini licha ya sare ya jumla ya 2-2, baada ya wiki iliyopita kushinda 1-0 mjini Madrid na katika fainali itamenyana na mshindi wa jumla kati ya Real Madrid na Manchester City zinazorudiana usiku wa Jumatano Uwanja wa Santiago Bernabeu mjini Madrid, baada ya sare ya 0-0 katika mchezo wa kwanza mjini Manchester  PICHA ZAIDI GONGA HAPA

YANGA INAPEPEA, NGOMA APIGA MBILI, TAMBWE MOJA… CHAMA LA WANA HOI!

Na Prince Akbar, SHINYANGA
YANGA imezidi kuusogelea ubingwa wa Ligi Kuu ya Vodacom Tanzania Bara kuafutia ushindi wa mabao 3-1 dhidi ya Stand United jioni ya leo Uwanja wa Kambarage, Shinyanga.
Ushindi huo ulitokana na mabao mawili ya washambuliaji wa kimataifa wa Zimbabwe, Donald Ngoma na Amissi Tambwe wa Burundi, unaifanya Yanga ifikishe pointi 68 baada ya kucheza mechi 27.
Yanga sasa inaweza kutangaza ubingwa ndani ya mechi mbili zijazo kati ya tatu za mwisho, iwapo itaendeleza wimbi la ushindi. 
Katika mchezo wa leo, hadi mapumziko, Yanga tayari walikuwa mbele kwa mabao 2-0, yote yakifungwa na mshambuliaji wa kimataifa wa Zimbabwe, Donald Ngoma.
Ngoma alifunga bao la kwanza dakika ya pili kwa shuti kali, baada ya kuupitia mpira kwenye himaya ya mabeki wa Stand, Nassor Masoud ‘Chollo’ na Assouman David.  
Ngoma tena akawainua vitini mashabiki wa Yanga dakika ya 45 kwa bao zuri akimlamba chenga kipa wa Stand United, Frank Muwonge baaada ya kutanguliziwa pasi nzuri na Mrundi, Amissi Tambwe.
Kipindi cha pili, Yanga ilikianza vizuri tena na kufanikuwa kupata bao la tatu lililofungwa na Tambwe dakika ya 63 akimalizia kona ya winga Simon Msuva. 
Elias Maguri akaifungia bao la kufutia machozi Stand United dakika ya 82 baada ya kiungo wa Yanga Mzimbabwe, Thabani Kamusoko kumchezea rafu kiungo wa Stand, Suleiman Kassim 'Selembe'. 
Yanga waliendelea kulisakama lango la Stand, lakini bahati yao leo ilikuwa ni 3-1.
Kikosi cha Yanga SC kilikuwa; Deo Munishi ‘Dida’, Juma Abdul, Oscar Joshua, Kevin Yondan/Vincent Bossou dk66, Nadir Haroub ‘Cannavaro’, Salum Telela/Mbuyu Twite dk46, Simon Msuva, Thabani Kamusoko, Amissi Tambwe, Donald Ngoma na Deus Kaseke.
Stand United; Frank Muwonge, Revocatus Richard, Selemani Mrisho, Nassor Masoud ‘Chollo’, Assouman David, Jacob Massawe, Vitalis Mayanga, Amri Kiemba, Elius Maguli, Suleiman Kassim ‘Selembe’ na Salum Kamana/Pastory Athanas dk60. 

KIPA WA SIMBA AFUTIWA ADHABU, JAMAA WA GEITA RUFAA ZAO ZADUNDA

Na Mwandishi Wetu, DAR ES SALAAM
KAMATI ya rufaa ya Nidhamu ya Shirikisho la Soka Tanzania (TFF) imemfutia adhabu ya kufungiwa miaka 10 kipa wa Simba, Denis Dioniz Richard. 
Kaimu Mwenyekiti wa kamati hiyo, Wakili Levocatus Kuuli amesema leo mjini Dar es Salaam kwamba, Dennis aliyeadhibiwa wakati anacheza kwa mkopo Geita Gold ya Daraja la Kwanza, amfutiwa adhabu kwa sababu hakuna ushahidi wa kutosha dhidi yake.
Wakili Kuuli amesema walipitia rufaa za washitakiwa nane kati ya 22 waliotiwa hatuani kwa upangaji matokeo ya mechi za Daraja la Kwanza.
"Denis Dioniz Richard, kipa wa Geita ameachiwa huru kutokana na mapungufu yalikuwepo katika vifungu vya sheria za TFF,"amesema Wakili Kuulu.
Katika huku nyingine, Kocha msaidizi wa Geita, Abeid Choki ataendelea na kifungo chake cha kutojihusisha na mpira maisha baada ya rufaa yake kugonga mwamba.
Geita Gold Mining wataendelea na adhabu ya kushushwa daraja baada ya kubadilisha vithibitisho katika rufaa yao.
Kamisaa Salehe Mang'ola ataendelea na kifungo chake cha kutojihusisha na mpira maisha baada ya rufaa yake kugonga mwamba.
Katibu wa Chama cha Soka Tabora (TAREFA), Fate Remtulah, taendelea na kifungo cha kutojihusisha na mpira maisha baada rufaa yake kushindikana.
Mwenyekiti wa TAREFA, Yusuph Kitumbo ataendelea kutumikia kifungo cha kutojihusisha na mpira maisha a ya rufaa yake kugonga mwamba.
Polisi Tabora itaendelea kutumikia adhabu ya kushushwa daraja kutokana na rufaa yao kutupiliwa mbali, wakati JKT Oljoro adhabu yake ya kushushwa daraja itaendelea, bali watarudishiwa fedha yao ya rufaa shilingi milioni moja kutokana na kanuni kuwa na mapungufu.
Kamati hiyo imetoa siku 10 kuanzia leo kwa warufani kukata rufaa endapo hawakuridhika na hukumu hiyo.

HIVI NDIVYO ERASTO NYONI ALIVYOWAUMIZIA SIMBA UGANDO WAO

Mshambuliaji kinda wa Simba SC, Hijja Ugando akiwa na jeraha kichwani baada ya kuumizwa na beki wa Azam FC, Erasto Nyoni katika mchezo wa Ligi Kuu ya Vodacom Tanzania Bara Jumapili Uwanja wa Taifa, Dar es Salaam timu hizo zikitoka sare ya 0-0

DE GEA MCHEZAJI BORA WA MWAKA MAN UNITED, RASHFORD NAYE ANG'ARA

WASHINDI WA TUZO ZA MANCHESTER UNITED 

Mchezaji Bora wa Mwaka: David de Gea
Mchezaji Bora wa Mwaka wa Wachezaji: Chris Smalling 
Mchezaji Bora wa U-21: Cameron Borthwick-Jackson 
Mchezaji Bora wa U-18: Marcus Rashford
Bao Bora la Msimu: Anthony Martial v Liverpool   
Kipa wa Manchester United, David de Gea akipokea tuzo yake Mchezaji Bora wa Mwaka wa timu hiyo PICHA ZAIDI GONGA HAPA

WACHEZAJI wawili wa Manchester United, David de Gea na Chris Smalling wameng'ara katika tuzo za msimu za klabu hiyo inayofundishwa na Louis van Gaal.
De Gea ameshinda tuzio ya Mchezaji Bora wa Mwaka chaguo la mashabiki wa klabu, wakati Smalling ameshinda Mchezaji Bora wa Mwaka chaguo la wachezaji wenzake katika sherehe zilizofanyika usiku wa Jumatatu Old Trafford.
Kipa wa kimataifa wa Hispania, De Gea amekuwa katika kiwango kizuri msimu huu akiokoa michomo mingi ya hatari na kuisaidia United kubeba pointi.
Mshambuliaji kinda, Marcus Rashford ameshinda tuzo ya Mchezaji Bora wa Mwaka wa umri chini ya miaka 18, wakati beki Cameron Borthwick-Jackson ameshinda Mchezaji Bora kwa vijana chini ya umri wa miaka 21. 

SHEREHE ZA UBINGWA LEICESTER CITY ZAANZA MAPEMAAAA

Wachezaji wa Leicester City wakisherehekea ubingwa wa England baada ya kuishuhudia kwenye Televisheni Chelsea ikilazimisha sare ya 2-2 na waliokuwa wapinzani waop kwenye mbio za taji, Tottenham Hotspur  PICHA ZAIDI GONGA HAPA

CHELSEA WAPELEKA UBINGWA LEICESTER, WAIKOMALIA SPURS SARE 2-2 DARAJANI

Mshambuliaji wa Chelsea, Eden Hazard (kushoto) akifumua shuti la nguvu kuisawazishia timu yake usiku wa Jumatatu katika mchezo wa Ligi Kuu ya England dhidi ya Tottenham Hotspur Uwanja wa Stamford Bridge, London timu hizo zikitoka sare ya 2-2. Bao lingine la Chelsea limefungwa na Gary Cahill, wakati ya Spurs yamefungwa na Harry Kane na Son Heung-min na kwa sare hiyo Leicester City wanakuwa mabingwa wapya wa England kwani pointi zao 77 haziwezi tena kufikiwa na Spurs  PICHA ZAIDI GONGA HAPA

RATIBA YA MECHI ZA YANGA YACHEZEWA TENA, LEO WANA KAZI NA STAND UNITED KAMBARAGE

Na Mwandishi Wetu, DAR ES SALAAM
MECHI ya Ligi Kuu ya Vodacom Tanzania Bara kati ya Ndanda FC ya Mtwara na Yanga SC imerudishwa nyuma kwa siku moja na sasa itachezwa Mei 14, 2016 badala ya Mei 15, 2016 kama ratiba ya awali inavyosomeka.
Taarifa ya Bodi ya Ligi Kuu ya Shirikisho la Soka Tanzania (TFF) imesema sababu za kurudisha nyuma mchezo huo Na. 218 utakaofanyika Uwanja wa Nangwanda Sijaona mjini Mtwara ni kuipa timu ya Young Africans nafasi ya kujiandaa na kusafiri kwenda nchini Angola kwenye mchezo wa kimataifa wa Kombe la Shirikisho Barani Afrika.

Mbali ya mechi hiyo, kuna michezo miwili ambayo imesogezwa mbele kwa siku moja. Mechi hizo ni kati ya Simba na Mwadui ambayo sasa itachezwa Mei 8, 2016 badala ya Mei 7, 2016.
Sababu za mchezo huo kusogezwa mbele ni kwamba Mei 7, 2016 kutakuwa na mchezo wa kimataifa utakaozikutanisha Yanga dhidi ya Sagrada Esperanca ya Angola kuwania Kombe la Shirikisho.
Mchezo mwingine uliosogezwa mbele ni kati ya Kagera Sugar dhidi ya Azam FC ambao sasa utafanyika Mei 8, 2016 badala ya Mei 7, 2016.
Sababu za mchezo huo kusogezwa mbele ni Uwanja wa Kambarage Shinyanga. Mei 7, 2016 uwanja huo utakuwa na mchezo kati ya Stand United ya Shinyanga dhidi ya Coastal Union ya Tanga.
Kadhalika Ligi Kuu Tanzania Bara, inatarajiwa kuendelea kesho Mei 3, 2016 kwa mchezo mmoja ambao Yanga itakuwa mgeni wa Stand United kwenye Uwanja wa Kambarage, Shinyanga.
Jumatano Mei 4, 2016 Azam FC ya Dar es Salaam itakuwa mwenyeji wa JKT Ruvu ya Pwani kwenye Uwanja wa Azam, Chamazi nje kidogo ya jiji la Dar es Salaam.
Michezo hiyo itaanza saa 10.000 jioni na kurushwa moja kwa moja na vituo vya televisheni ya Azam.    

KUNA SEHEMU MSONDO NA SIKINDE WANAPIGWA CHENGA YA MWILI

AWALI ya yote nichukue fursa hii kusema kuwa onyesho la juzi usiku la Sikinde na Msondo lililofanyika TCC Club Chang’ombe lilinivutia sana na niliburudika mpaka baaasi.
Binafsi naamini hizi ndiyo bendi zenye nyimbo nyingi tamu kuliko bendi yoyote ile katika historia ya muziki wa dansi hapa Tanzania. Bendi hizi zina hazina ya nyimbo kali zisizochuja, nyimbo zilizojaa tungo zilizokwenda shule, bendi ambazo ndiyo zimekuwa chachu ya kuibuka kwa wasanii wengi wa dansi wanaofanya vizuri kwenye bendi nyingine kibao. Sikinde na Msondo ni ‘Simba na Yanga’ ya muziki wa dansi.

Lakini kwa bahati mbaya sana, mashabiki wa bendi hizi wanapatikana zaidi manyumbani badala ya ukumbini na hapo ndipo yanapoibuka maajabu mawili ya Msondo na Sikinde.
Maajabu ya kwanza ni kwamba licha ya hazina ya nyimbo nzuri, hazina ya wanamuziki ‘mafundi’ wenye kujua A,B,C ya muziki, hazina ya historia ya kipekee, lakini bado bendi hizo zinatumbuiza mbele ya mashabiki wasiozidi 250 kwenye maonyesho yao ya kila wiki tena ya kiingilio cha bei rahisi kama sio bure kabisa.
Inashangaza sana, kwanini watu wakauke hivyo ukumbini? Jibu la haraka haraka utakalopewa ni media haitoi nafasi.Wala sibishi, ni kweli kabisa media zimeutupa muziki wa dansi, lakini ndiyo iwe sababu ya wanamuziki wa dansi kukubali kufa kikondoo bila kupambambana? 
Mbona kuna nafasi kubwa sana kwenye mitandao ya kijamii? Hivi wanamuziki wanafahamu kuwa mitandao ya kijamii kama facebook, instagram, yutube, blogs, twitter na nyinginezo zinaweza kuinyanyua nyimbo hadi kumshawishi mtu wa radio na televisheni kuitumia kazi yako?
Mimi naamini zaidi ya watu 300 waliohudhiria onyesho lile la Jumamosi wametokana na mijadala, mabishano na majigambo yaliyofanyika kwenye kurasa za facebook katika kuelekea kwa show hiyo.
Maajabu ya pili ninayoyaona katika bendi za Msondo na Sikinde ni pale maonyesho yao maalum yanapojaza umati mkubwa watu kupindukia tena kwa kiingilio cha bei mbaya.
Ukipiga kwa kiingilio cha bei chee mahudhurio kiduchu, onyesho maalum la kiingilio cha bei mbaya watu nyomi!! hapa ndipo Sikinde na Msondo wanapopigwa chenga ya mwili, kwanini? Kipo cha kujifunza hapo.
Ni kwamba Sikinde na Msondo bado ni bendi zenye mashabiki wengi ila wanachohitaji mashabiki wao ni maonyesho maalum yenye hadhi ya kipekee, jikumbushe tamasha la Gurumo, miaka 50 ya Msondo, miaka 37 ya Sikinde yote yalishona watu vizuri.
Inawezekana Msondo na Sikinde wanapiga kwenye kumbi ambazo hazifanani tena na mashabiki wao, kumbi ambazo hazina usalama mzuri wa mteja na mali yake, kumbi ambazo  hazina mandhari ya kuvutia wala huduma nzuri ya vyakula na vinywaji.
Ukipima maonyesho ya Msondo yanayofanyika Leaders Club na TCC Club, ukiangalia hadhi ya watu wanaofika sehemu hizo mbili halafu ukalinganisha na pale Kinondoni Bar mtaa wa Togo jirani na kituo kidogo cha polisi cha Mtambani, utabaini namna fikra zangu juu ya ukumbi bora inavyoweza kuwa sababu ya kudidimiza bendi kongwe.
Angalia namna onyesho la wakongwe wenzao wa Njenje pale Salender Bridge Club linavyonona watu wenye hadhi za kila namna halafu vuta picha itakuwa vipi Njenje wakihamia DDC Kariakoo kila Jumamosi. Ni wazi kuwa mahudhurio yao yatapungua sana.
Msondo na Sikinde wanapaswa kuingia kwenye kipindi cha mpito cha kutathmini upya soko lao na mazingira wanayopiga muziki wao, wakiiwashia njaa feni na kukubali kupiga show za kuunga unga kwenye kumbi za barazani watazidi kudidimia. Ipo haja ya wao kujiongeza na kupandisha hadhi yao kwa makusudi, ifike wakati wajijengee uwezo wa kuandaa matamasha  makubwa wao wenyewe badala ya kuketi kitako na kusubiri mapromota.
Ipo haja ya Sikinde na Msondo kupunguza maonyesho yao ya kila wiki na kubakiza machache ambayo wataweza kuyaongezea nguvu ya promosheni. 
Msondo na Sikinde wajiwekee ratiba ya kufanya maonyesho kama ya juzi angalau mara tatu kwa mwaka ili kutunisha mifuko yao na kufidia pengo la kupunguza maonyesho yao ya kila wiki.

SIMBA NA AZAM KATIKA PICHA JANA TAIFA

Kiungo wa Azam FC, Khamis Mcha 'Vialli' akijiviuta kupiga shuti mbele ya beki wa Simba, Novaty Lufunga katika mchezo wa Ligi Kuu ya Vodacom Tanzania Bara jana Uwanja wa Taifa, Dar es Salaam. Timu hizo zzilitoka 0-0
Beki wa Azam FC, Gardiel MIchael akijaribu kuupitia mpira miguuni mwa beki wa Simba, Emery Nimubona
Kiungo wa Azam FC, Rmadhani Singano 'Messi' (kushoto) akimlamba chenga kiungo wa Simba, Justivea Mabajvi
Mshambuliaji wa Azam FC, Kipre Tchetche (kushoto) akifumua shuti mbele ya Emery Nimubona wa Simba  
Ramadhani Singano 'Messi' akipasua katikati ya Juuko Murshid (kushoto) na Jonas Mkude (kulia) 
Kiungo wa Simba, Awadha Juma akimtoka kiungo wa Azam FC, Jean Babptiste Mugiraneza

KAMUSOKO ‘AWAPIGIA SALUTI’ JUMA ABDUL NA NIYONZIMA, ASEMA VIJANA WANAJUA SOKA BALAA

Na Prince Akbar, DAR ES SALAAM
KIUNGO wa kimataifa wa Zimbabwe, Thabani Scara Kamusoko (pichani kushoto) amewasifu wachezaji wenzake wawili wa Yanga, beki Juma Abdul Mnyamani na kiungo Haruna Fadhil Niyonzima kwamba wana uwezo mkubwa kisoka.
Kamusoko aliye katika msimu wake wa kwanza Yanga SC baada ya kujiunga nayo kutoka Platinums FC ya kwao Julai mwaka jana, amesema Juma Abdul na Niyonzima, ambaye ni Nahodha wa Rwanda wana vipaji vikubwa.
“Nimecheza mpira kwa muda mrefu, lakini hawa wachezaji wawili Juma Abdul na Haruna Niyonzima na miongoni mwa bora niliowahi kucheza nao,”amesema Kamusoko.
Rasta huyo amesema wachezaji hao wana uwezo mkubwa kisoka na wanaweza kucheza popote duniani, zaidi ya Tanzania na Yanga.
“Hawa wawili ni wachezaji wazuri miongoni mwa wazuri niliowahi kucheza nao, nawatakia heri Mungu awasaidie waweze kucheza kwa miaka mingi”amesema.
Katika msimu wake wa kwanza tu Yanga, Kamusoko ametokea kuwa kipenzi cha wapenzi wa timu hiyo kutokana na msaada wake ndani ya kikosi cha wana Jangwani hao.
Pamoja na kucheza nafasi ya kiungo akiwa mpishi wa mabao mengi yanayofungwa na washambuliaji wa timu hiyo, Mzimbabwe mwenzake Donald Ngoma na Mrundi, Amissi Tambwe, lakini naye Kamusoko  amefunga mabao nane katika mechi 46.
Kesho, Kamusoko anatarajiwa kuichezea Yanga katika mechi ya 47 itakapomenyana na Stand United Uwanja wa Kambarage, Shinyanga katika mfululizo wa Ligi Kuu ya Vodacom Tanzania Bara.
Yanga SC inahitaji pointi saba katika mechi nne zilkizobaki ili kufikisha 72 na kutangaza ubingwa mapema, kwani haziwezi kufikiwa na timu nyingine.
Mechi nne za Ligi Kuu za Yanga zilizobaki zote ni za ugenini tupu kuanzia dhidi ya Stand United kesho, Ndanda FC mjini Mtwara, Mbeya City mjini Mbeya na Majimaji mjini Songea baadaye. 

MKWARA GANI AWADH ALIKUWA ANAMCHIMBA MKUDE HAPA?

Kiungo wa Simba, Awadh Juma (kulia) akimuambia jambo kwa msistizo Nahodha wake, Jonas Mkude (kushoto) wakati wa mapumziko kwenye mchezo wa Ligi Kuu ya Vodacom Tanzania Bara dhidi ya Azam FC Uwanja wa Taifa, Dar es Salaam. Timu hizo zilitoka sare ya 0-0 

SADIO MANE AWAGONGA HAT TRICK MAN CITY WAKILALA 4-2 KWA SOUTHAMPTON

Mshambuliaji wa kimataifa wa Senegal, Sadio Mane akishangilia baada ya kuifungia mabao matatu peke yake Southampton dakika za 28, 57 na 68 katika ushindi wa 4-2 dhidi ya Manchester City Uwanja wa St. Mary's katika mchezo wa Ligi Kuu ya England usiku wa leo. Bao lingine la Watakatifu limefungwa na Shane Long dakika ya 25, wakati ya City yamefungwa na Mnigeria Kelechi Promise Iheanacho dakika za 44 na 78  PICHA ZAIDI GONGA HAPA

SAMATTA ALIMWA YA NJANO GENK IKICHEZEA 3-1 UBELGIJI

Na Mwandishi Wetu, BRUGGE
MSHAMBULIAJI wa kimataifa wa Tanzania, Mbwana Ally Samatta amelimwa kadi ya njano timu yake KRC Genk ikifungwa mabao 3-1 na Club Brugge katika mchezo wa mchujo wa Ligi Kuu ya Ubelgiji kuwania kucheza michuano ya Ulaya.
Mchezo huo wa ugenini uliofanyika Uwanja wa Jan Breydelstadion mjini Brugge, Samatta alilimwa kadi hiyo dakika ya 76, ambayo inakuwa ya pili tangu ajiunge na timu hiyo Januari mwaka huu akitokea TP Mazembe ya DRC.
Mbwana Samatta leo amelimwa kadi ya pili ya njano tangu aanze kucheza Ubelgiji 
Katika mchezo huo, kwa mara ya kwanza Samatta alicheza dakika zote 90 jahazi la timu yake likizama kwa mabao ya Waholanzi beki Stefano Denswil dakika ya 21, kiungo Ruud Vormer dakika ya 43 na kiungo Myahudi, Lior Refaelov dakika ya 60.
Bao pekee la Genk leo limefungwa na mshambuliaji Mgiriki, Nikolaos Karelis dakika ya 89.
Samatta leo amecheza mechi ya 12 tangu ajiunge na Genk akitoka kushinda taji la Ligi ya Mabingwa Afrika na TP Mazembe pamoja na kutwaa tuzo ya Mwanasoka Bora Anayecheza Afrika.
Katike mechi hizo, ambazo tano tu alianza, mshambuliaji huyo wa zamani wa Simba SC ya Dar es Salaam, amefunga mabao nne, moja katika kila mechi Genk ikishindia 2-1 ugenini dhidi ya wenyeji SV Zulte-Waregem, 4-0 na 4-1 dhidi ya KV Oostende na 3-2 dhidi ya Club Brugge mchezo wa kwanza.

Top