HABARI MOTOMOTO

HABARI ZA NYUMBANI

HABARI PICHA

HABARI ZA KIMATAIFA

HABARI ZA AFRIKA

MAKALA

LA LIGA

LA LIGA

LIGI KUU YA ENGLAND

MAKTABA YA BIN ZUBEIRY

AZAM FC KUZILETA TP MAZEMBE NA ZESCO UNITED DAR

KLABU Bingwa ya Afrika Mashariki na Kati, Azam FC, inatarajia kuwa mwenyeji wa michuano maalumu ya kimataifa ya timu nne itakayofanyika mwanzoni mwa mwakani.
Michuano hiyo ni ile waliyoenda kushiriki jijini Ndola Zambia hivi karibuni na kutwaa ubingwa, ambapo imeanzishwa kwa muungano wa klabu tatu, Azam FC, TP Mazembe na Zesco United.
Ofisa Mtendaji Mkuu wa Azam FC, Saad Kawemba, alisema mwakani ni zamu yao kuandaa michuano hiyo na hivi sasa wanajipanga  kuweza kuwaalika marafiki zao hao pamoja na kuangalia namna gani watakavyocheza nao hapa nyumbani.

“Tulialikwa kwa mara ya kwanza kwenye michuano hiyo ilipofanyika Kongo katika mji wa Lubumbashi, ambapo tulikubaliana kimaandishi kwamba tutengeneze umoja huu, ambao ni umoja wa vilabu vitatu TP Mazembe, Zesco United na sisi Azam FC.
“Na mwaka huu tumepata nafasi hiyo tena kwa kualikwa, ambapo tumeweza kuwa mabingwa na mwaka jana TP Mazembe walikuwa mabingwa na akaenda kuchukua ubingwa wa Afrika (Ligi ya Mabingwa Afrika), kwa hiyo Azam FC mwaka huu tumechukua ubingwa tunategemea kupata matokeo mazuri katika mashindano ya CAF kwa sababu mechi nzuri na tumejiandaa,” alisema.
Kawemba alisema kuwa lengo kubwa la kuunda umoja huo ni kuweza kuzipa nafasi timu zinazoshiriki michuano ya CAF kuweza kufanya mazoezi kwa pamoja, huku akisisitiza kuwa michuano ya umoja huo ni mikubwa na sio kama wengi wanavyodhania.
“Ingawa watu wanaona kuwa hayana tija, lakini kwetu tunaamini ya kuwa yanatija na yametupa nafasi hiyo ya kujijenga, kila mtu aliona tulivyocheza mwaka jana dhidi ya El Merreikh baada ya kutoka Lubumbashi na mwaka huu tunaamini kabisa mechi ya Bidvest Wits itakuwa tofauti na tulikuwa tukisema hivyo pia hata hao wanaotubeza sasa hivi walikuwa wakituuliza Azam mnajiandaa kwa namna gani kwenye michuano ya Kimataifa, kwa hiyo haya ndio majibu na huwa hatuzungumzi bali tunafanya kwa vitendo,” alisema.
Aliongeza kuwa; “Na sio kama tunabeza mtu yoyote, hatuwezi kujiandaa kucheza dhidi ya Bidvest kwa kucheza na klabu ya hapa nyumbani, hakuna klabu yoyote inayoweza kutupa mazoezi hapa, kwa hiyo tumeenda kufanya mazoezi huko kwa ajili ya Bidvest na timu zinazokuja na kwa hapa nyumbani tumerudi, tumefanya mazoezi ya juu kidogo na tunaamini hakutakuwa na tatizo lolote.”
Bosi huyo aliwaondoa hofu mashabiki wa Azam FC kwa kuwaambia kuwa wamekuja kuendeleza pale walipoishia na hawana wasiwasi kwa yanayoendelea hivi sasa Tanzania katika Ligi Kuu ya Vodacom Tanzania Bara (VPL).
“Tunaangalia michezo yetu iliyoko mbele yetu na tuna uhakika tutafanya vizuri na tutakaa katika nafasi ambayo tunastahili kukaa na kila mtu anajua nafasi hiyo ni ipi,” alimalizia Kawemba.
Azam FC inayodhaminiwa na Benki ya NMB hivi sasa inashika nafasi ya tatu kwenye msimamo wa ligi ikiwa imejisanyia jumla ya pointi 42 sawa na Simba inayokamata nafasi ya pili na Yanga inayoshika usukani kwa pointi 43.
Lakini matajiri hao wa Azam Complex wana mechi mbili mkononi, zinazoweza kuwaweka juu kileleni kwa tofauti ya pointi tano kwa atakayemfuatia kama wakizishinda zote, jambo la kuvutia zaidi mpaka sasa ndio timu pekee kwenye ligi ambayo haijapoteza mchezo wowote.

HAJATOKEA KIPA MWINGINE KAMA ATHUMANI MAMBOSASA

Kipa wa Simba SC, Athumani Mambosasa (marehemu) akidaka mpira mbele ya mshambuliaji wa Yanga SC, Kitwana Manara katika fainali ya Klabu Bingwa ya Taifa Agosti 10 mwaka 1974 Uwanja wa Nyamagana mjini Mwanza. Yanga SC ilishinda 2-1, mabao ya Gibson Sembuli (marehemu) na Sunday Manara, huku bao pekee la Simba SC likifungwa na Adam Sabu (marehemu). Inaaminika Mambosasa ndiye kipa bora zaidi kuwahi kutokea Tanzania hadi sasa.

BODI YA LIGI INACHEMSHA...NA KAMATI YA AKINA KABURU, SANGA NAYO...

HAPANA shaka Ligi Kuu ya England ndiyo inayoongoza kupendwa na kufuatiliwa na wengi miongoni mwa mashabiki wa soka duniani.
Ni ligi bora kwa maana zote, ushindani wa timu, ubora wa soka pia na umaarufu.
Ligi hiyo inaendeshwa na Bodi Maalum, ambayo imeundwa kama Kampuni binafasi, inayomilikiwa na klabu 20 zinazoshiriki Ligi Kuu katika msimu husika. 
Kila moja kati ya klabu 20 zinakuwa na hisa katika Ligi Kuu na hukutana kila mwisho mwa msimu kupanga mikakati na taratibu mbalimbali za msimu mwingine wa Ligi Kuu katika Mkutano maarufu kama AGM.

Inapofika mwishoni mwa msimu, timu zinazoshuka Daraja hukabidhi hisa zao kwa timu zinazopanda kutoka Daraja la Kwanza, maarufu kama Championship.
Klabu zinakuwa na fursa ya kupendekeza sheria mpya na mambo mbalimbali katika Mkutano wa mwaka, huku kila klabu ikiwa na kura moja katika michakato ya masuala yote yanayohitaji kupigiwa kura kwa maamuzi. 
Chama cha Soka England (FA) ndiye msimamizi mkuu wa soka nchini humo ikiwemo Ligi Kuu na Kanuni zake. 
FA ya England nayo ni mwanahisa maalum katika Ligi Kuu, ambaye hata hivyo haina mamlaka katika uendeshwaji wa kila siku wa Ligi Kuu. 
Kila mwaka, Ligi Kuu wanawasilisha sheria zao kwa FA ili zihakikiwe na kuidhiniahwa kutumika, na FA ya England inabaki na wajibu wa kusimamia marefa, klabu na wachezaji ndani na nje ya Uwanja katika masuala yote ya kinidhamu, ndani na nje ya Uwanja.
Huo ndiyo mfumo wa ligi nyingi duniani hivi sasa hata Afrika, vyama vya soka vimejitoa katika kusimamia na kuendesha ligi, vikibaki tu kuendesha na kusimamia moja kwa moja mashindano yake maalum, tu kama FA.
Nchini Tanzania Bara kwa mwaka wa tatu sasa nasi Ligi yetu imeundiwa chombo binafasi, mali ya klabu, kiitwacho Bodi ya Ligi Kuu.
Hakuna tofauti ya kimfumo kwa Bodi ya Ligi ya England na Bodi ya Ligi ya Tanzania Bara, zote zinamilikiwa na klabu.
Kumekuwa na malalamiko ya bodi kutopewa mamlaka ya moja kwa moja katika masuala yanayohusu ligi, hususan mikataba ya udhamini na kadhalika.
Lakini pamoja na kuwapo kwa bodi ya ligi, pia kuna chombo kimeundwa na Shirikisho la Soka Tanzania (TFF), kiitwacho Kamati ya Mashindano, nacho pia kinajikuta kinahusishwa na uendeshwaji wa Ligi.
Kamati ya Mashindano inaundwa na viongozi wa kuteuliwa kutoka klabu mbalimbali mfano Mwenyekiti wake, Injinia Geoffrey Nyange ‘Kaburu’ ambaye pia ni Makamu wa Rais wa Simba SC, Makamu wake, Clement Sanga pia ni Makamu Mwenyekiti wa klabu ya Yanga pia.
Wajumbe wa Kamati hiyo ni James Mhagama, Stewart Masima, Steven Njowoka na Sheikh Said Mohammed wa Azam FC. 
Pamoja na kwamba Wajumbe wa Kamati ya Mashindano wamekuwa wakiisukumia lawama Bodi ya Ligi kwa mapungufu yote yanayojitokeza kuhusu mwenendo wa Ligi Kuu, lakini na wao pia wamekuwa wakinyooshewa vidole.
Inaonekana viongozi wa Simba, Yanga na Azam FC wana nguvu ya moja kwa moja ya kubadilisha mwelekeo wa Ligi Kuu kwa maslahi yao binafsi bila kujali athari zake, tu kwa sababu wana mikono kwenye vyombo hivyo viwili, yaani Bodi ya Ligi na Kamati ya Mashindano.
Hii imesababisha Ratiba ya Ligi kupanguliwa mara kwa mara, kanuni kutozingatiwa na kadhalika.
Kwa mfano mwanzoni mwa msimu kulijitokeza mkanganyiko wa kikanuni, klabu ya Simba ikimtumia mchezaji Ibrahim Hajib akiwa ana kadi tatu za njano, kwa madai kuna mabadiliko ya kanuni.
Simba SC walisema kuna kanuni mpya inaipa fursa klabu kuchagua mechi za mchezaji kukosa akiwa anatumikia adhabu ya kadi.
Hili lilivuja kutoka kwenye Kamati ya Mashindano na ikadaiwa chanzo kilikuwa Mwenyekiti wa Kamati hiyo, Kaburu ambaye pia ni Makamu Rais wa Simba SC.
Lakini kumbe suala hilo lilijadiliwa tu na halikupitishwa, lakini Simba SC ikavunja kanuni kutokana na kwamba Mwenyekiti wa Kamati ya Mashindano ni wao – Kaburu wakaamini mambo yatakuwa kama yanavyotarajiwa.
Mwisho wa siku, kanuni hiyo haikupitishwa na makosa makubwa yakaingia kwenye kumbukumbu, Simba SC ikivuna pointi tatu haramu kutokana na kumtumia mchezaji mwenye kadi tatu za njano.
Sahau kuhusu mapungufu yaliyomo ndani ya Bodi ya Ligi Kuu, mfumo wake wa utendaji kuwa mbovu na hata uwajibikaji usioridhisha wa Maofisa walioajiriwa.
Ipo haja ya kuiboresha Bodi ya Ligi, iwe na sura kama bodi nyingine kongwe katika uendeshaji wa Ligi duniani, mfano Ligi Kuu ya England na pia kuipa Mamlaka kamili, ili TFF wabaki kusimamia sheria na kanuni tu ndani na nje ya Uwanja.
Tazama ilivyo sasa, unapofikiria suluhisho la mapungufu ya Bodi na Watendaji wake, linakuja suala la Kamati ya Mashindano pia kuchangia kuivuruga ligi yenyewe. Siyo sahihi.

FURAHA YA KABILA DRC KUBEBA CHAN 2016, KILA MCHEZAJI APEWA JEEP LA MILIONI 120

RAIS wa Jamhuri ya Kidemokrasia ya Kongo (DRC), Joseph Kabila ametimiza ahadi yake kwa kumpa kila mchezaji wa timu ya taifa gari ya aina ya Jeep yenye thamani ya dola za Kimarekani 60,000 (zaidi ya Sh. Milioni 120) kila moja baada ya kutwaa ubingwa wa Michuano ya Ubingwa wa Mataifa (CHAN), inayohusisha wachezaji wanaocheza ligi za nchini mwao pekee.
DRC walitwaa Kombe hilo Jumapili kwa kuifunga Mali mabao 3-0 katika fainali ya michuano ya mwaka huu Uwanja wa Amahoro, Kigali, nchini Rwanda na leo wachezaji wote walialikwa Ikulu mjini Kinshasa kwa pongezi na zawadi zao za magari.
Wachezaji wa DRC wakiwa katika picha ya pamoja na Rais Kabila leo Ikulu mjini Kinshasa
Gari aina ya Jeep zikiwa viwanja vya Ikulu mjini Kinshasa leo
Benchi la Ufundi na wachezaji wote, kila mmoja ana Jeep lake moja

DRC ambao walipewa dola za Kimarekani 750,000 kwa kutwaa Kombe hilo, huku Mali wakipata dola 400,000 kwa kumaliza nafasi ya pili. Ivory Coast waliomaliza nafasi ya tatu na Guinea wa nne, kila timu imepata dola 250,000 walifurahi pamoja na Rais wao leo.
Ikumbukwe DRC ndiyo mabingwa wa fainali za kwanza za CHAN mwaka 2009 nchini Ivory Coast.

MIYEYUSHO KUZIPIGA NA NASSIB RAMADHANI PASAKA TAIFA

Mabondia Fransic Miyeyusho 'Chichi Mawe' (kushoto) na Nassibu Ramadhani wakitunishiana misuli ya ngumi wakati wa utambulisho wa pambano lao likalofanyika siku ya Pasaka Uwanja wa Ndani wa Taifa, Dar es Salaam. Katikati ni Mratibu wa pambano na bondia wa zamani, Anthony Rutta

KING CLASS AKIMPA 'MAUJUZI' MAOKOLA KABLA YA PAMBANO NA SINKALA

Bondia Ibrahimu Maokola (kushoto) akizipiga na Ibrahim Class 'King Class Mawe' katika mazoezi mjini Dar es Salaam leo. Maokola anajiandaa na pambano la ubingwa wa Taifa dhidi ya Joseph Sinkala litakalofanyika Machi 12 ukumbi wa Dar Live, Mbagala, Dar es Salaam. katikati ni kocha Rajabu Mhamila 'Super D'. 

YANGA SC YABEBA ‘JESHI LA MAANGAMIZI’ SAFARI YA MAURITIUS, KAMUSOKO NA CANNAVARO WOTE NDANI

Na Prince Akbar, DAR ES SALAAM
YANGA SC inatarajiwa kuondoka na kikosi chake kamili kesho kwenda Mauritius kwa ajili ya mchezo wa kwanza wa Raundi ya Awali ya Ligi ya Mabingwa Afrika dhidi ya wenyeji, Cercle de Joachim. 
Hata hivyo, Yanga SC haijajua itaondoka na ndege ya saa ngapi kwa sababu Shirika la Ndege la Afrika Kusini (SA) limeshindwa kuwapatia ndege ya kuunganisha mapema mjini Johannesburg, kwenda Curepipe, Mauritius.  
Mkuu wa Idara ya Habari na Mawasiliano ya Yanga SC, Jerry Muro ameiambia BIN ZUBEIRY SPORTS – ONLINE leo kwamba kwa sasa uongozi unawasiliana na Shirika la Ndege la Afrika Kusini ili kujua ratiba kamili ya safari.
“Ndege ya mapema ambayo tulitarajia kuunganisha Johannesburg kwenda Mauritius bahati mbaya imejaa, sasa SA wanatutafutia ndege nyingine, maana yake hatujajua na hapa watatupangia ndege ya saa ngapi tuondoke nayo,”amesema Muro.
Lakini Muro amesema kila kitu kipo sawa, isipokuwa ni SA wenyewe na ratiba zao za ndege za kuunganisha kuanzia Johannesburg ndiyo inawafanya hadi sasa wawe hawajajua ratiba yao kamili ya safari.
Mchezo huo unatarajiwa kuchezwa Jumamosi kuanzia Saa 9:30 Alasiri kwa saa za Mauritius Uwanja wa Curepipe mjini Curepipe na Pluijm amebebea karibu kikosi chake chote, akiacha wachezaji watatu tu.
Hao ni kipa wa tatu, Benedicto Tinocco, kiungo Godfrey Mwashiuya na mshambuliaji Matheo Anthony. 
Wachezaji waliokuwa majeruhi, Nahodha Nadir Haroub ‘Cannavaro’, kiungo Thabani Kamusoko na mshambuliaji Amissi Tambwe wote watasafiri na timu.
Mkuu wa Msafara ni Ayoub Nyenzi, Mjumbe wa Kamati ya Utendaji ya Shirikisho la Soka Tanzania (TFF), wakati upande wa viongozi wanakwenda Katibu Mkuu, Baraka Deusdedit na Muro.

KIKOSI KINACHOKWENDA MAURITUS;
Makipa; Ally Mustafa ‘Barthez’ na Deo Munishi ‘Dida’.
Mabeki; Juma Abdul, Mbuyu Twite (DRC), Oscar Joshua, Mwinyi Hajji Mngwali, Nadir Haroub ‘Cannavaro’, Kevin Yondan, Vincent Bossou (Togo) na Pato Ngonyani.
Viungo ni; Said Juma ‘Makapu’, Salum Telela, Thabani Kamusoko (Zimbabwe), Haruna Niyonzima (Rwanda), Simon Msuva, Issoufou Boubacar (Niger) na Deus Kaseke.
Washambuliaji ni; Malimi Busungu, Paul Nonga, Amissi Tambwe (Burundi) na Donald Ngoma (Zimbabwe).
Kocha Mkuu wa Yanga SC, Hans van der Pluijm kushoto amebeba karibu kikosi chake chote kwa safari ya Mauritius

BENCHI LA UFUNDI; 
Kocha Mkuu; Hans van der Pluijm (Uholanzi)
Kocha Msaidizi; Juma Mwambusi
Kocha wa Makipa; Juma Pondamali
Daktari; Nassor Matuzya
Meneja; Hafidh Saleh
Mchua Misuli; Jacob Onyango
Mtunza Vifaa; Mohammed Mpogolo

AZAM FC YATAMBA KUENDELEZA REKODI YAKE NZURI MECHI ZA UGENINI

KOCHA Mkuu wa Klabu Bingwa ya Afrika Mashariki na Kati Azam FC, Stewart Hall, amesema kuwa wameweka malengo ya kushinda mchezo ujao wa Ligi Kuu ya Vodacom Tanzania Bara (VPL) ili kuendeleza rekodi yao nzuri ya mechi za ugenini.
Hadi sasa, Azam FC imecheza mechi saba ugenini, ikishinda sita zote nje ya viwanja vya Dar es Salaam na kutoa sare mchezo mmoja dhidi ya Yanga (1-1) katika Uwanja wa Taifa jijini Dar es Salaam, kitakwimu imekusanya pointi 19 ugenini kati ya 21 ilizotakiwa kuzipata.
Coastal Union iliyojikusanyia jumla ya 13 katika nafasi ya 14 kwenye msimamo wa ligi, ilikubali kipigo cha mabao 2-0 kwenye mchezo wa kwanza uliofanyika Uwanja wa Azam Complex, mabao yaliyofungwa na Shomari Kapombe na Kipre Tchetche.
Stewart Hall (kushoto) ametamba kuendeleza rekodi nzuri ya Azam FC kwa mechi za ugenini

Akizungumza baada ya mazoezi ya leo asubuhi, Hall alisema anajua mchezo huo utakuwa mgumu lakini wamejipanga kushinda, huku akisisitiza kuwa wana rekodi nzuri ya ushindi katika Uwanja wa Mkwakwani, mjini Tanga wanakoenda kuchezea.
“Baada ya mchezo wa Jumapili iliyopita dhidi ya Mwadui wachezaji wangu wameonekana kuchoka hasa kutokana na ziara ya Zambia, hivyo najaribu kurudisha nishati kwa wachezaji wangu na kurejesha furaha ya kila mmoja kwa kuwapa mazoezi sahihi leo na kesho, kwa sababu unapokuwa umechoka ni ngumu kuwa na furaha kwa kuwa unajijua ya kuwa umechoka, hivyo nitaanza kuwapa mbinu za mchezo huo Alhamisi, Ijumaa na Jumamosi,” alisema.
Hall aliongeza kuwa: “Tutasafiri kwenda Tanga Ijumaa na tutafanya mazoezi yetu kwenye uwanja tutakaochezea Jumamosi, tunaijua Tanga tumeanza kwenda pale miaka mingi, tunajua kuwa kuna hali ngumu, kila mmoja amepata wakati mgumu Tanga, tunajua kuwa Yanga, Simba wamepata shida pale, lakini kwetu sisi tumekuwa na rekodi nzuri pale na tunatakiwa kuiendeleza kwa kushinda mchezo.”
Akizungumzia michezo miwili ya kiporo waliyokuwa nayo dhidi ya Tanzania Prisons (Februari 24) na Stand United (Machi 16), Hall alisema wana nafasi kubwa ya kukaa kwenye nafasi bora katika msimamo wa ligi kama watashinda mechi hizo.
“Jambo zuri hivi sasa kila mtu na magazeti yote ni wamekuwa wakizimulika Simba, Yanga, kwa sababu ukiangalia kwenye msimamo unaonyesha kuwa Yanga, Simba na Azam FC ikifuatia, hivyo sisi hivi sasa tupo kimya ambalo ni jambo zuri kwetu, tunawaache wapinzani wetu waongee, magazeti yatabiri bingwa kama ni Simba au Yanga, na kila mmoja ametusahau sisi kitu ambacho ni kizuri,” alisema.
Aidha alisema kuwa ameshaweka wazi kuwa bingwa wa ligi hawezi kupatikana kwa timu kuongoza ligi mwezi Januari na Februari, bali timu inatayotwaa ubingwa ni ile iliyokaa kileleni kuanzia mwezi Aprili na Mei, ligi inapoelekea kumalizika.
Ukiondoa rekodi nzuri ya mechi za ugenini, Azam FC mpaka sasa pia imeshacheza michezo tisa nyumbani ikishinda saba na kutoa sare mechi mbili, mmoja ukiwa ni ule waliochezana Simba katika Uwanja wa Taifa (2-2) huku sare nyingine wakitoa na African Sports (1-1) katika Uwanja wa Azam Complex.
Hivyo kitakwimu mpaka sasa kwenye mechi hizo walizocheza nyumbani, Azam FC imezoa pointi 23 kati ya 27 walizotakiwa kuzipata.
Jambo zuri zaidi miongoni mwa timu 16 za ligi, Azam FC ndio timu pekee ambayo haijafungwa mchezo wowote, ikishinda 13 na sare tatu na kujikita katika nafasi ya tatu kwenye msimamo sawa na Simba iliyo nafasi ya pili na Yanga kileleni kwa pointi 43, lakini matajiri hao wa Azam Complex wanamichezo miwili mkononi.

NAHODHA WA KENYA VICTOR WANYAMA NJE WIKI SITA KWA 'MIRAFU' YAKE

KADI NYEKUNDU ZA WANYAMA 2015/16 

Novemba 1; dhidi ya Bournemouth
Januari 2; dhidi ya Norwich
Februari 6; dhidi ya West Ham
NAHODHA wa Kenya na kiungo wa Southampton ya Ligi Kuu ya England, Victor Wanyama atakuwa nje ya Uwanja kwa wiki sita baada ya FA ya England kumfungia mechi tano kufuatia kuonyeshwa kadi nyekundu katika mechi dhidi ya West.
Hiyo ilikuwa mara ya tatu kwa kiungo huyo mwenye umri wa miaka 24 kuonyeshwa kadi nyekundu msimu huu, anaongezewa mechi mbili za kukosa baada ya rafu aliyomchezea Dimitri Payet.
Kiungo wa Southampton, Victor Wanyama akiinuka baada ya kumchezea rafu Dimitri Payet PICHA ZAIDI GONGA HAPA

Mkenya huyo alionyeshwa kadi ya pili ya njano na kutolewa nje kwa kadi nyekundu katika mechi dhidi ya Bournemouth mwezi Novemba na tena akaonyeshwa kadi mbili za njano dhidi ya Norwich mwanzoni mwa Januari.
Inamaanisha Nahodha huyo wa Kenya, ambayo jukumu lake ni kuilinda safu ya ulinzi katika mfumo wa Saints, hataonekana uwanjani hadi kwenye mchezo wa nyumbani dhidi ya Liverpool Machi 19.
Pia anakabiliwa na faini ya klabu ya kukatwa hadi mshahara wa wiki mbili, na kocha Ronald Koeman amesema: "Hii si kadi nyekundu ya kwanza kwake, ni ya tatu, na hiyo si nzuri. Unatakiwa kujifunza kutokana na makosa yako, hivyo nitazungumza naye juu ya hilo,"amesema.

MECHI AMBAZO WANYAMA ATAZIKOSA 

Februari 13 Vs Swansea (Ugenini)
Februari 27 Vs Chelsea (Nyumbani)
Machi 1 Vs Bournemouth (Ugenini)
Machi 5 Vs Sunderland (Nyumbani)
Machi 12 Vs Stoke (Ugenini)

KART ZOUMA NJE MIEZI SITA, ATAKOSA HADI MICHUANO YA EURO 2016

BEKI wa Chelsea, Kurt Zouma amekuwa mwenye masikitiko baada ya kuambiwa ataikosa sehemu yote iliyobaki ya msimu pamoja na michuano ya Euro 2016 kutokana na kuumia mguu.
Mwanasoka huyo wa kimataifa wa Ufaransa anatakiwa kuwa nje ya Uwanja kwa miezi sita baada ya kuumia mguu katika mechi dhidi ya Manchester United Jumapili.
Zouma atakwenda kufanyiwa upasuaji wiki hii baada ya kuumia mguu wake wa kulia katika mchezo uliokwisha kwa sare ya 1-1.

Beki wa Chelsea, Kurt Zouma anatarajiwa kuwa nje kwa miezi sita baada ya kuumia goti PICHA ZAIDI GONGA HAPA

Kinda huyo ataikosa sehemu yote iliyobaki ya msimu, michuano ya Kombe la Mataifa ya Ulaya ambayo itafanyika kwenye ardhi ya nchi yake na atalazimika kupambana ili kurejea mwanzoni mwa msimu ujao.
Zouma ameposti kwenye ukurasa wake wa Twitter: "Vipimo leo vimeonyesha nimeumia ACL. Nitafanyiwa upasuaji wiki hii na nitarejea imara. Asanteni wote kwa ujumbe wenu.’ 

THOM 'RAMBO' ULIMWENGU AIZIDI KUPIGA MABAO MAZEMBE

NYOTA ya Mtanzania Thomas Emmanuel Ulimwengu (pichani kulia) imeendelea kung'ara katika klabu ya Tout Puissant Mazembe baada ya leo kufunga bao katika ushindi wa 5-0 dhidi ya FC Lubumbashi kwenye mechi yab Ligi Kuu ya DRC.
Ulimwengu, maarufu kwa jina la utani Rambo Jamhuri ya Kidemokrasia ya Kongo, alianza kwa kumsetia Roger Assale kufunga bao la kwanza dakika ya 16 Uwanja wa Mazembe mjini Lubumbashi.
Baadaye mshambuliaji huyo wa kimataifa wa Tanzania, akafunga bao lake mwenyewe dakika ya 23 kwa pasi ya Assale kabla ya Luyindama kufunga dakika ya 75 na  Rainford Kalaba mawili dakika ya 76 na 84 kuhitimisha sherehe za mabao ya Mazembe katika mchezo huo.
Lakini Ulimwengu ambaye leo amefunga katika mechi ya pili mfululizo, alimpisha Kalaba dakika ya 63.
Akizungumza na BIN ZUBEIRY SPORTS - ONLINE baada ya mchezo huo, Ulimwengu amesema kwamba amefurahi kuendelea kufanya vizuri katika klabu hiyo chini ya kocha mpya, Mfaransa Hubert Velud, aliyerithi mikoba ya Patrice Carteron ambaye hakuongezewa Mkataba mapema Januari baada ya kuitumikia klabu hiyo tangu mwaka 2013.

PHIRI ALIPOAHIDI KUIBAKISHA LIGI KUU MBEYA CITY BAADA YA KUSAINI MKATABA LEO

Kocha Mmalawi, Kinnah Phiri (kulia) akizungumza na Waandishi wa Habari kwenye ofisi ya Meya wa Jiji la Mbeya, Mstahiki David Mwashilindi, (picha ya chini katikati)  baada ya kusaini kufundisha klabu ya Mbeya City inayoshiriki Ligi Kuu ya Vodacom Tanzania Bara leo mjini humo
Kocha Phiri (kushoto) akisaini Mkatava. Katikati ni Mstahiki Meya wa Jiji la Mbeya, David Mwashilindi
Phiri ameahidi kuhakikisha anaibakisha Ligi Kuu Mbeya City kabla ya kuanza kuisuka upya msimu ujao

MECHAK MCHEZAJI BORA, RWANDA YATOA WA BENCHI KIKOSI CHA CHAN

KIUNGO wa Jamhuri ya Kidemokrasia ya Kongo (DRC),Elia Mechak amechaguliwa Mchezaji Bora wa Michuano ya Ubingwa wa Mataifa ya Afrika (CHAN) iliyofikia tamati jana mjini Kigali, Rwanda.
Mchezaji huyo wa Don Bosco ya Ligi Kuu ya DRC, jana alifunga mabao mawili wakati Kongo ikiifunga 3-0 Mali na kutwaa ubingwa wa CHAN Uwanja wa Amahoro, Kigali nchini Rwanda.
Na kwa mabao hayo, Mechak pia amekuwa mfungaji bora wa CHAN ya 2016 kwa kufikisha mabao manne na kutoa pasi mbili za mabao.

N’Guessan Serge wa Ivory Coast ameshinda tuzo ya Bao Bora la Mashindano kutokana na bao alilofunga dhidi ya Cameroon, wakati DRC mbali na ubingwa imeshinda tuzo ya Mchezo wa Kiungwana.
Kikosi Bora CHAN 2016 kinaundwa na kipa; Ley Matampi (DRC), mabeki; Abdoul Karim Dante (Mali), Joel Kimwaki (DRC), Cheick Ibrahim Comara (Ivory Coast), Mohamed Youla (Guinea).
Viungo; Ibrahima Sory Sankhon (Guinea), Mechack Elia (DRC), N’Guessan Serge (Ivory Coast), Hamidou Sinayoko (Mali) na washambuliaji; Jonathan Bolingi (DRC) na Sekou Koita (Mali).
Wchezaji wa akiba walioteuliwa ni; Badra Ali Sangare (Ivory Coast), Djigui Diarra (Mali), Lomalisa Mutambala (DRC), Heritier Luvumbu (DRC), Daouda Camara (Guinea), Aka Essis (Ivory Coast), Ernest Sugira (Rwanda), Ahmed Akaichi (Tunisia), Elvis Chisom Chikataba (Nigeria) na Christopher Katongo (Zambia).
DRC ilitwaa ubingwa wa CHAN, michuano inayohusisha wachezaji wanaocheza ligi za nchini mwao pekee kwa kuifunga Mali mabao 3-0 katika fainali Uwanja wa Amahoro, Kigali, nchini Rwanda.
Na kwa ushindi huo, Kongo wamepatiwa dola za Kimarekani 750,000 wakati Mali wamepata dola 400,000 kwa kumaliza nafasi ya pili. Ivory Coast waliomaliza nafasi ya tatu na Guinea wa nne, kila timu imepata dola 250,000.
Elia Mechack alifunga dakika ya 28 na 62 kabla ya Jonathan Bolingi kufunga la tatu dakika ya 73 kuifanya DRC itwae taji la pili katika fainali za nne tangu kuanzishwa kwa CHAN.
Ikumbukwe DRC ndiyo mabingwa wa fainali za kwanza za CHAN mwaka 2009 nchini Ivory Coast.
Mapema katika mchezo wa kusaka mshindi wa tatu, Ivory Coast iliifunga mabao 2-1 Guinea na kunyakua Medali ya Shaba.

Mabao ya Ivory Coast yamefungwa na Mohamed Youla aliyejifunga dakika ya 33 na Gbagnon Anice Badie dakika ya 35, wakati la Guinea lilifungwa na Aboubacar Leo Camara dakika ya 86.

KAMUSOKO MCHEZAJI BORA LIGI KUU DESEMBA 2015

KIUNGO Mzimbabwe, Thabani Scara Kamusoko (pichani kushoto) amechaguliwa kuwa mchezaji bora wa Ligi Kuu ya Vodacom Tanzania Bara kwa mwezi Desemba 2015 baada ya kumshinda mchezaji mwenzake wa Yanga SC, Mrundi Amissi Tambwe).
Kamusoko ameisaidia timu yake ya Yanga katika michezo iliyochezwa Desemba kwa kushiriki dakika zote katika michezo mitatu iliyochezwa mwezi huo wa mwisho wa mwaka.
Kwa kuchaguliwa kwake kuwa mchezaji bora wa wa mwezi Disemba, Kamusoko atakabidhiwa zawadi ya fedha taslimu Sh 1,000,000 kutoka kwa wadhamini wa Ligi Kuu, kampuni ya simu za mkononi ya Vodacom.

VIPORO VYA AZAM VYAPATIWA TAREHE MWAFAKA, NI DHIDI YA PRISONS NA STAND

Na Mwandishi Wetu, DAR ES SALAAM
MECHI mbili za viporo za Azam FC dhidi ya Prisons na dhidi ya Mwadui FC zimepangiwa tarehe mpya.
Azam FC itamenyana na Prisons Februari 24, mwaka huu Uwanja wa Sokoine mjini Mbeya kabla ya kumenyana na Stand United Machi 16, Uwanja wa Azam Complex, Chamazi, Dar es Salaam.
Lakini timu zote zitaendelea na ratiba iliyopo ya Ligi Kuu, Azam FC ikimenyana na wenyeji Coastal Union Uwanja wa Mkwakwani, Tanga Jumapili, wakati Stand United wataikaribisha Simba SC Jumamosi mjini Shinyanga na Prisons wataifuata Mwadui FC Jumapili.
Azam FC ilikuwa Zambia ambako imetwaa ubingwa wa michuano maalum

Azam FC iliondolewa kwenye ratiba ya Ligi Kuu wiki mbili zilizopita ili iende kucheza michuano maalum ya kirafiki nchini Zambia.
Katika michuano hiyo iliyoshirikisha pia timu za wenyeji, Zanaco FC na Zesco United pamoja na Chicken Inn ya Zimbabwe, Azam FC iliibuka bingwa.
Baada ya kurejea nchini, Azam FC ilicheza mechi yake ya kwanza jana Uwanja wa Azam Complex, Chamazi na kushinda 1-0 dhidi ya Mwadui FC, bao pekee la Kipre Herman Tchetche dakika ya 18.

MECHI MBILI ZA YANGA LIGI KUU ZAAHIRISHWA, SASA IKITOKA MAURITIUS KUIVAA SIMBA FEB 20

RATIBA YA LIGI KUU YA VODACOM TANZANIA BARA…
Februari 13, 2016
Stand United Vs Simba SC
Mgambo JKT Vs African Sports
Mbeya City Vs Toto Africans
Ndanda FC Vs Majimaji
JKT Ruvu Vs Kagera Sugar
Februari 14, 2016
Mwadui FC Vs Prisons
Coastal Union Vs Azam FC
Yanga SC itaondoka Jumatano kwenda Mauritius kwa ajili ya mchezo wa Ligi ya Mabingwa Afrika

Na Mahmoud Zubeiry, DAR ES SALAAM
MECHI mbili za Ligi Kuu ya Vodacom Tanzania za klabu ya Yanga SC dhidi ya Mtibwa Sugar na dhidi ya African Sports zimefutwa na zitapangiwa tarehe nyingine.
Ofisa Habari wa Shirikisho la Soka Tanzania (TFF), Baraka Kizuguto ameiambia BIN ZUBEIRY SPORTS – ONLINE leo kwamba mechi hizo zimefutwa ili kupisha mechi mbili za Yanga SC za Ligi ya Mabingwa Afrika.
Yanga SC inatarajiwa kuondoka nchini Jumatano kwenda Mauritius kwa ajili ya mchezo wa kwanza wa Raundi ya Awali ya Ligi ya Mabingwa Afrika dhidi ya wenyeji, Cercle de Joachim uliopangwa kuanza Saa 9:30 Alasiri kwa saa za huko Uwanja wa Curepipe mjini Curepipe.
Na timu hizo zitarudiana wiki mbili baadaye, Februari 27 Uwanja wa Taifa Dar es Salaam. 
Lakini mara tu baada ya mchezo wa kwanza na Joachim nchini Maurtius, Yanga itarejea kwenye Ligi Kuu kwa ajili ya mchezo na mahasimu wa jadi, Simba SC Februari 20, mwaka huu Uwanja wa Taifa. 
Pamoja na hayo, Ligi Kuu inatarajiwa kuendelea mwishoni mwa wiki, Stand United wakiikaribisha  Simba SC Uwanja wa Kambarage, Shinyanga, Mgambo JKT na African Sports Uwanja wa Mkwakwani, Tanga, Mbeya City na Toto Africans Uwanja wa Sokoine, Mbeya, Ndanda FC na Majimaji Uwanja wa Nangwanda SIjaona, Mtwara na JKT Ruvu na Kagera Sugar Uwanja wa Karume, Dar es Salaam.
Februari 14 kutakuwa na mechi mbili, Mwadui FC dhidi ya Prisons Uwanja wa Mwadui Complex, Shinyanga na Coastal Union na Azam FC Uwanja wa Mkwakwani, Tanga.

SIMBA SC ILIVYOENDELEZA WIMBI LA USHINDI KATIKA LIGI KUU JANA

Mshambuliaji wa Simba SC, Ibrahim Hajib akiwatoka mabeki wa Kagera Sugar katika mchezo wa Ligi Kuu ya Vodacom Tanzania Bara jana Uwanja wa Kambarage, Shinyanga. Simba SC ilishinda 1-0, bao pekee la Hajib
Mshambuliaji wa Simba SC, Hamisi Kiiza (kushoto) akimtoka beki wa Kagera Sugar, Juma Jabu
Kiungo wa Kagera, Adam Kingwande akimtoka kiungo wa Simba SC, Mwinyi Kazimoto

Kikosi cha Simba SC jana Uwanja wa Kambarage, Shinyanga
Kikosi cha Kagera Sugar jana Uwanja wa Kambarage mjini Shinyanga

YANGA SC 'ILIVYOJITAFUNIA' JKT RUVU JANA UWANJA WA TAIFA

Mshambuliaji wa Yanga SC, Donald Ngoma akiwatoka mabeki wa JKT Ruvu katika mchezo wa Ligi Kuu ya Vodacom Tanzania Bara jana Uwanja wa Taifa, Dar es Salaam. Yanga SC ilishinda 4-0
Mshambuliaji wa Yanga SC, Malimi Busungu akichuana na beki wa JKT Ruvu
Winga wa Yanga SC, Simon Msuva akimtoka beki wa JKT Ruvu
Beki wa JKT Ruvu akiondosha hatari langoni mwake
Kikosi cha Yanga SC jana Uwanja wa Taifa, Dar es Salaam
Kikosi cha JKT Ruvu kilkichokula 4-0 jana Taifa

AZAM FC NA MWADUI FC KATIKA PICHA JANA CHAMAZI

Beki wa Mwadui FC, Joram Mgeveke (kulia) akimdhibiti mshambuliaji wa Azam FC, Kipre Herman Tchetche katika mchezo wa Ligi Kuu ya Vodacom Tanzania Bara jana Uwanja wa Azam Complex, Chamazi, Dar es Salaam. Azam FC ilishinda 1-0
Nahodha wa Azam FC, John Bocco kushoto akimtia majaribu kipa wa Mwadui FC
Beki wa Mwadui FC, Malika Ndeule akimiliki mpira pembeni ya winga wa Azam FC, Ramadhani Singano 'Messi' 

Kiungo wa Azam FC, Salum Abubakar 'Sure Boy' akipasua katikati ya wachezaji wa Mwadui FC 

BENZEMA, LUKA MODRIC WAIBEBA REAL MADRID MECHI YA UGENINI LA LIGA

Mshambuliaji wa Real Madrid, Karim Benzema akishangilia baada ya kuifungia timu yake bao la kwanza dakika ya 30 katika ushindi wa 2-1 dhidi ya wenyeji, Granada kwenye mchezo wa La Liga usiku wa jana Uwanja wa Los Carmenes. Bao lingine la Real lilifungwa na Luka Modric dakika ya 85, wakati la wenyeji limefungwa na Youssef El-Arabi dakika ya 60 PICHA ZAIDI GONGA HAPA

HESHIMA KWENU FM ACADEMIA KWA WIMBO “MOYO WANGU”

MIEZI kadhaa nyuma nilisifia wimbo Twanga Pepeta "Usiyaogope Maisha" kwa namna ulivyoshirikisha waimbaji wachache akiwemo Ally Chocky, Rama Pentagon na Saleh Kupaza.
Nilipenda sana ushiriki huo wa waimbaji wachache, nikapenda pia ufupi wa nyimbo nikiamini ndio msingi wa mahitaji ya soko la sasa hivi.
Kwa bahati mbaya sana waimbaji wengi wa Twanga hawakupendezwa na mageuzi yale yaliyofanywa na mtunzi Ally Chocky kwa kuwapiga benchi waimbaji wengine katika wimbo huo, ikafika hatua hata baadhi yao kususa kuitikia pale unapopigwa 'live' jukwaani.

Napenda sana muziki wa dansi, lakini niwe mkweli, nachukia sana nyimbo ndefu pasipo na ulazima wa nyimbo kuwa ndefu, nachukia nyimbo zinazoimbwa na waimbaji wengi pasipo na ulazima wa kufanya hivyo - Waimbaji watano hadi sita kila mmoja anatupia kipande chake, halafu baada ya hapo watafuata marapa watatu kila mmoja na pande lake, kwa kweli huwa inachusha.
Kwa bahati mbaya au nzuri mimi ni muumin wa muziki wa zamani na kwa yeyote mwenye kumbukumbu na muziki wa zamani atabaini kuwa hiki kinachoanza kufanywa sasa na wasanii wa dansi kupunguza urefu wa nyimbo na msururu wa waimbaji, si kipya wala si kufuata mkumbo wa bongo fleva, bali ndiyo hali halisi iliyokuwepo kwenye muziki wa zamani wa dansi.
Tafuta nyimbo kama Rangi ya Chungwa, Georgina, MV Mapenzi, Chatu, Ngalula, Makumbele, Ogopa Tapeli, Tuma na nyingine nyingi halafu tazama muda uliotumika na kisha uliza waimbaji mastaa waliopigwa benchi kwenye hizo nyimbo. 
Kuna wimbo mmoja mpya wa FM Academia unaokwenda kwa jina la "Moyo Wangu" utunzi wake mwimbaji anayejulikana zaidi kwa jila la 33. Niseme sentensi moja tu kwa Wazee wa Ngwasuma: HESHIMA KWENU.
“Moyo Wangu” ni aina ya nyimbo ambazo zitaleta ukombozi kwenye muziki wa dansi – wimbo mfupi, ujumbe unaoeleweka, uimbaji mzuri, mpangilio safi wa vyombo, achilia mbali ubora wa video yake.
Kwa sehemu kubwa ya wimbo, mwimbaji aliyetawala ni 33, asindikizwa kwa mbali na Redock Mauzo. Waimbaji wenye majina makubwa kama Nyoshi el Saadat, Patcho Mwamba, Pablo Masai  na King Blaze wamekaa kando lakini bado kazi imesimama ile mbaya.
Kumekuwa na malalamiko kila kukicha kuwa vituo vya radio na televisheni vimekuwa vikiubania muziki wa dansi. Sitaki kuegemea sana upande huo ila ukweli ni kwamba kuna wakati wasanii na wadau wa muziki dansi wanakuwa kama ile hadithi ya “Kwenye msafara wa mamba kenge nao wamo”.
Kwamba inafika wakati hata mwenye nyimbo mbovu naye analalamika kuwa muziki dansi unabaniwa. Hii ni kasumba mbaya ambayo itazidi kuudidimiza muziki wa dansi baada ya kuukomboa.
Wakati mwingine wanamuziki wa dansi wapime ubora wa nyimbo zao kabla ya kulalamika - unapotoa nyimbo ambayo ndani yake waimbaji ni kama wanaimba nyimbo tano tofauti, yaani kila mmoja na maudhui yake, halafu mpangilio wa vyombo haushawishi hata mtu kunesa nesa, kisha ukalalamika kuwa wimbo wako unabaniwa basi unakuwa huna tofauti na kenge kwenye msafara wa mamba.
“Moyo Wangu” wa FM Academia ni aina ya nyimbo ambazo kama itakosa ‘air time’ ya kutosha kwenye vituo vya radio na televisheni, basi wadau wa muziki wa dansi wanastahili kulalamika - ni jambo la ajabu wimbo kama huo kutiwa kapuni.
Nichukue fursa hii kuwaammbia FM Academia wimbo huu ni moja ya silaha yao muhimu katika kurejea safari ya mafanikio waliyozoa kwenye albam ya “Dunia Kigeugeu”, - hawapaswi kubweteka na badala yake watumie nguvu kubwa kuusambaza kila kona.
Majuzi nilimsikia Ally Chocky akizungumza na kituo kimoja cha radio ambapo licha kusema kuwa muziki wa dansi hauwezi kufa, lakini akawaasa wanamuziki wenzake kufanya mageuzi kwa kutengeneza nyimbo nzuri na fupi. Kwangu mimi naamini ngoma hii ya “Moyo Wangu” ni aina ya mabadiliko anayoyataka Chocky.

NI DRC MABINGWA WA CHAN 2016, IVORY COAST WASHIKA NAFASI YA TATU

JAMHURI ya Kidemokrasia ya Kongo (DRC) ndiyo mabingwa wa Michuano ya Ubingwa wa Mataifa (CHAN), inayohusisha wachezaji wanaocheza ligi za nchini mwao pekee.
Hiyo inafuatia kuifunga Mali mabao 3-0 katika fainali ya michuano ya mwaka huu Uwanja wa Amahoro, Kigali, nchini Rwanda.
Na kwa ushindi huo, Kongo wamepatiwa dola za Kimarekani 750,000 wakati Mali wamepata dola 400,000 kwa kumaliza nafasi ya pili. Ivory Coast waliomaliza nafasi ya tatu na Guinea wa nne, kila timu imepata dola 250,000.
Elia Meschack alifunga dakika ya 28 na 62 kabla ya Jonathan Bolingi kufunga la tatu dakika ya 73 kuifanya DRC itwae taji la pili katika fainali za nne tangu kuanzishwa kwa CHAN.
Ikumbukwe DRC ndiyo mabingwa wa fainali za kwanza za CHAN mwaka 2009 nchini Ivory Coast.

DRC wamerudia mafanikio ya mwaka 2009 walipotwaa ubingwa wa fainali za kwanza za CHAN nchini Ivory Coast

Mapema katika mchezo wa kusaka mshindi wa tatu, Ivory Coast iliifunga mabao 2-1 Guinea na kunyakua Medali ya Shaba.
Mabao ya Ivory Coast yamefungwa na Mohamed Youla aliyejifunga dakika ya 33 na Gbagnon Anice Badie dakika ya 35, wakati la Guinea lilifungwa na Aboubacar Leo Camara dakika ya 86.

DIEGO COSTA AINUSURU CHELSEA KULALA KWA MAN UNITED, SARE 1-1 DARAJANI

Mshambuliaji wa Chelsea, Diego Costa akishangilia baada ya kuifungia timu yake bao la kuswazisha dakika ya 91 katika sare ya 1-1 na Manchester United Uwanja wa Stamford Bridge kwenye mchezo wa Ligi Kuu ya England. Man United walitangulia kupata bao kupitia kwa Jesse Lingard dakika ya 61 PICHA ZAIDI GONGA HAPA

NGASSA ATOA PASI YA BAO LAKINI FREE STATE YAPIGWA 5-2 NA MAMELODI AFRIKA KUSINI

MSHAMBULIAJI wa kimataifa wa Tanzania, Mrisho Khalfan Ngassa ametoa pasi ya bao timu yake, Free State Stars ikifungwa mabao 5-2 na Mamelodi Sundowns katika mchezo wa Ligi Kuu ya ABSA Afrika Kusini leo Uwanja wa James Motlatsi. 
Ngassa aliyekosa mechi mbili zilizopita kutokana na kuwa majeruhi, alimlamba chenga Hlompho Kekana kabla ya kumpasia Danny Venter aliyefunga dakika ya kwanza tu. Bao lingine la Free State limefungwa na Mashego dakika ya 90.
Mabao ya Mamelodi yamefungwa na Wayne Arendse, Keagan Dolly, Leonardo Castro, Khama Billiat na Mogakolodi Ngele.
Mrisho Ngassa (kushoto) ametoa pasi ya bao leo Free State ikifungwa 5-2 na Mamelodi

Arendse alifunga dakika ya 41, Dolly dakika ya 57, Castro dakika ya 61, Billiat dakika ya 75 na Ngele dakika ya 87.
Kikosi cha Free State Stars kilikuwa; Diakite, Mashego, Sankara/Gopane dk72, Nkausu/T. Shabalala dk55, Tlhone, Venter, Masehe, Chabalala, Ngasa, Ngcobo/Somaeb dk57 na Mohomi.
Mamelodi Sundowns: Sandilands, S. Zwane/Mashaba dk54, Mbekile, Langerman, Nthethe, Arendse, Kekana, Modise, Dolly, Billiat/Ngele dk79, Castro/Soumahoro dk75.

BARCELONA HAIKAMATIKI HISPANIA, YAITANDIKA 2-0 LEVANTE LA LIGA

Mshambuliaji wa Barcelona, Lionel Messi (kushoto) akimpongeza mchezaji mwenzake, Luis Suarez baada ya kufunga bao la pili katika ushindi wa 2-0 dhidi ya Levante kwenye mchezo wa La Liga leo Uwanja wa Ciudad de Valencia. Bao lingine la Barca David Navarro wa Levante alijifunga PICHA ZAIDI GONGA HAPA

ARSENAL YANG'ARA UGENINI ENGLAND, YAICHAPA 2-0 BOURNEMOUTH

Nyota wa Arsenal, Mesut Ozil akishangilia baada ya kuifungia timu yake bao katika ushindi wa 2-0 dhidi ya wenyeji, Bournemouth kwenye mchezo wa Ligi Kuu ya England leo Uwanja wa Vitality. Bao lingine la Arsenal limefungwa na Alex Oxlade Chamberlain PICHA ZAIDI GONGA HAPA

AZAM FC YAREJEA NA MOTO LIGI KUU, YAITANDIKA 1-0 MWADUI...TOTO YAIPIGA 2-1 COASTAL

MATOKEO LIGI KUU YA VODACOM TZ BARA
Februari 7, 2016
Kagera Sugar 0-1 Simba SC
Mbeya City 0-0 Prisons
JKT Ruvu 0-4 Yanga SC
Ndanda FC 1-1 Mtibwa Sugar
Azam FC 1-0 Mwadui FC
Toto Africans 2-1 Coastal Union
Majimaji 1-0 Mgambo JKT
Februari 6, 2016
African Sports 0-0 Stand United
Kipre Tchetche ameing'arisha Azam FC leo

Na Mwandishi Wetu, DAR ES SALAAM
BAO pekee la mshambuliaji kutoka Ivory Coast, Kipre Herman Tchetche limaipa Azam FC ushindi wa 1-0 dhidi ya Mwadui FC jioni ya leo katika mchezo wa Ligi Kuu ya Vodacom Tanzania Bara Uwanja wa Azam Complex, Chamazi, Dar es Salaam.
Kipre Tchetche, mchezaji wa zamani wa timu ya vijana ya Ivory Coast, alifunga bao hilo dakika ya 18 akimalizia pasi ya Nahodha John Bocco.
Na kwa ushindi huo, Azam FC inafikisha pointi 42 baada ya kucheza mechi 16, ikizidiwa pointi moja na mabingwa watetezi, Yanga SC waliocheza mechi mbili zaidi.
Azam FC sasa inafungana kwa pointi na Simba SC, inayokaa nafasi ya pili kwa wastani wake mzuri wa mabao, ingawa na wao wamecheza mechi mbili zaidi. 
Mechi nyingine za Ligi Kuu leo, Simba SC imeshinda 1-0 dhidi ya Kagera Sugar Uwanja wa Kambarage, Shinyanga, Yanga SC imeshinda 4-0 dhidi ya JKT Ruvu Uwanja wa Taifa, Dar es Salaam, wakati Mbeya City imetoka sare ya 0-0 na Prisons Uwanja wa Sokoine, Mbeya. 
Ndanda FC imelazimishwa sare ya 1-1 na Mtibwa Sugar Uwanja wa Nangwanda Sijaona, Mtwara, Toto Africans imeshinda 2-1 dhidi ya Coastal Union Uwanja wa CCM Kirumba, Mwanza, Majimaji imeshinda 1-0 dhidi ya Mgambo JKT Uwanja wa Majimaji, Songea, wakati jana African Sports ilitoa sare ya 0-0 na Stand United Uwanja wa Mkwakwani, Tanga.
Kikosi cha Azam FC kilikuwa; Aishi Manula, Shomary Kapombe, Erasto Nyoni, David Mwantika, Serge Wawa, Jean Mugiraneza, Himid Mao/Kipre Balou dk70, Salum Abubakar ‘Sure Boy’/Frank Domayo dk78, Ramadhani Singano ‘Messi’, Kipre Tchetche/Allan Wanga dk66na John Bocco.

YANGA SC YAZINDUKA, YAITANDIKA 4-0 JKT RUVU, MSUVA APIGA MBILI TAIFA

Na Prince Akbar, DAR ES SALAAM
BAADA ya kucheza mechi mbili za Ligi Kuu ya Vodacom Tanzania Bara bila ushindi ikifungwa na Coastal Union 2-0 Tanga na kutoa sare ya 2-2 na Prisons mjini Mbeya, Yanga SC leo imezinduka.
Mabingwa hao watetezi leo wameibuka na ushindi wa mabao 4-0 dhidi ya JKT Ruvu Uwanja wa Taifa, Dar es Salaam.
Ushindi huo, uliotokana na mabao ya Simon Msuva, Issofou Boubacar na Donald Ngoma unaifanya Yanga SC ifikishe pointi 43 baada ya kucheza mechi 18, ikifuatiwa na Simba SC yenye pointi 42 sawa na Azam FC.

Mfungaji bora wa Ligi Kuu msimu uliopita, Simon Msuva aliifungia Yanga SC bao la kwanza dakika ya 12 kwa shuti kali la umbali wa mita 27 baada ya kupokea pasi ya beki wa kulia Juma Abdul. 
Winga wa kimataifa wa Niger, Issoufou Boubacar aliifungia Yanga SC bao la pili dakika ya 44 baada ya kupokea pasi ya Msuva na kipindi cha pili, mshambuliaji Mzimbabwe Donald Ngoma akaifungia timu hiyo bao la tatu dakika ya 63.
Msuva akahitimisha sherehe za mabao za Yanga SC kwa kufunga la nne dakika ya 90 na ushei akimalizia pasi ya Deus Kaseke, ambaye naye alipewa pasi na Paul Nonga.
Kikosi cha Yanga SC kilikuwa; Ally Mustafa ‘Barthez’, Juma Abdul, Oscar Joshua, Mbuyu Twite, Vincent Bossou, Salum Telela, Simon Msuva, Haruna Niyonzima, Donald Ngoma/Godfrey Mwashiuya, Malimi Busungu/Paul Nonga dk46 na Issoufou Boubacar/Deus Kaseke dk54.
JKT Ruvu; Shaaban Dihile, Michael Aidan, Paul Mhidze, Nurdin Mohammed, Ramadhani Madenge, Nashon Naftali, Mussa Juma, Hassan Dilunga, Gaudence Mwaikimba, Samuel Kamuntu na Emmanuel Pius/Amos Mgisa dk77.

HAJIB AING’ARISHA SIMBA SC SHINYANGA, YAICHAPA KAGERA SUGAR 1-0 KAMBARAGE

Na Princess Asia, SHINYANGA
BAO pekee la mshambuliaji Ibrahim Hajib limeipa Simba SC ushindi wa 1-0 dhidi ya wenyeji Kagera Sugar Uwanja wa Kambarage, Shinyanga leo.
Ushindi huo unaifanya Simba SC iendelee kukaa nafasi ya pili katika msimamo wa Ligi Kuu, ikifikisha pointi 42 baada ya kucheza mechi 18. 
Hajib alifunga bao hilo dakika ya 45 baada ya kupata pasi ya kisigino ya Mganda, Hamisi Kiiza ingawa sifa zimuendee Mwinyi Kazimoto aliyepika bao hilo.
Ibrahim Hajib akishangilia baada ya kufunga leo Uwanja wa Kambarage

Hajib angeweza kuondoka na mabao mawili leo Uwanja wa Kambarage, kama si mkwaju wake wa penalti kupanguliwa na kipa Andrew Ntalla wa Kagera dakika a 83.
Refa Mathew Akrama wa Mwanza alimtoa nje kwa kadi nyekundu Daudi Jumanne wa Kagera Sugar dakika ya 91 kwa lugha chafu.
Kocha wa Kagera Mohammed ‘Adolph’ Rishard alikuwa akiwalalamikia marefa tangu mchezo unaendelea na baada ya mechi, wachezaji wa timu hiyo waliwavamia waamuzi, kabla ya kuondolewa na Polisi.
Kikosi cha Simba SC kilikuwa; Vincent Angban, Hassan Kessy, Mohammed Hussein ‘Tshabalala’, Abdi Banda, Juuko Murshid, Justice Majabvi, Mwinyi Kazimoto, Jonas Mkude, Hamisi Kiiza/Brian Majwega dk67, Ibrahim Hajib na Hajji Ugando/Danny Lyanga dk56.
Kagera Sugar; Andrew Ntalla, Salum Kanoni, Juma Jabu, Job Ibrahim, Shaaban Ibrahim, George Kavilla, Adam Kingwande, Daudi Jumanne, Martin Lupert, Mbaraka Yussuf, Paul Ngalyoma. 

Top