AKINA KIIZA, OKWI WANA KAZI NA ETHIOPIA LEO

Kikosi cha Uganda

Na Mahmoud Zubeiry, Kampala

MICHUANO ya Kombe la Mataifa ya Afrika Mashariki na Kati, CECAFA Tusker Challenge inatarajiwa kuendelea leo kwa michezo miwili ya Kundi A, kwenye Uwanja wa Mandela, Namboole mjini hapa.

Wenyeji na mabingwa watetezi, Uganda, The Cranes watashuka dimbani saa 12:00 jioni kumenyana na Ethiopia, mchezo ambao utatanguliwa na mechi kati ya Sudan Kusini na Kenya, Harambee Stars, utakaoanza saa 9:00 Alasiri.

Mechi zote mbili zinatarajiwa kuwa kali na za kusisimua, kulingana na matokeo ya awali ya mechi za Kundi hilo.

Cranes iliilaza 1-0 Kenya katika mchezo wa ufunguzi, bao pekee la mshambuliaji wa Saigon Xuan Thanh ya Vietnam, Geoffrey Kizito dakika ya 74, akiunganisha krosi ya Iguma Dennis.

Ethiopia iliifunga Sudan Kusini 1-0 pia, bao pekee la Yonatal Kebede Teklemariam na kwa matokeo hayo, Korongo wa Kampala wanafungana na Ethiopia kwa kila kitu kwenye Kundi A, kwa pointi tatu na bao moja kila timu. 

Kenya pamoja na kufungwa walicheza vizuri dhidi ya Uganda na kutengeneza nafasi ambazo walishindwa kuzitumia, wakati wapinzani wao walifanikiwa kutumia nafasi hiyo moja.

Sudan Kusini walicheza kwa kujihami zaidi siku hiyo, wakimuacha Nahodha wao, Hamisi Leon pekee mbele.

Wakati mchezo kati ya Uganda na Ethiopia, nchi pekee ya ukanda wa Afrika Mashariki na Kati iliyofuzu Fainali za Mataifa ya Afrika mwakani nchini Afrika Kusini unatarajiwa kuwa wa pande zote mbili, Kenya wanapewa nafasi kubwa ya kushinda dhidi ya mwanachama mpya wa CECAFA, Sudan Kusini.

Kikosi cha Uganda leo hakitarajiwi kuwa na mabadiliko makubwa sana na bila shaka kocha Msoctland Bobby Williamson akawarejesha wale wale walioshinda dhidi ya Kenya; Hamza Muwonge, Iguma Dennis, Godfrey Walusimbi,Henry kalungi, Isaac isinde, Hassan Wasswa, Geoffrey Kizito, Moses Oloya, Emmanuel Okwi, Hamisi Kiiza na Brian Umony.

Kwa Kenya, bila shaka kikosi kitakuwa; Duncan Ochieng, Anthony Kimani, Abdallah Juma, Jockins Atudo, David Owino, David Ochieng, Lama Salim Mohamed, Bernard Wanyama, Humphrey Mieno, Anthony ‘Muki’ Kimani/Enock Obiero na Clifton Miheso/Paul Were.

MSIMAMO KUNDI A:

 P   W  D   L    GF GA GD Pts

Ethiopia         1    1    0    0    1    0    1    3

Uganda          1    1    0    0    1    0    1    3

Sudan Kusini 1    0    0    1    0    1    -1  0

Kenya             1    0    0    1    0    1    -1  0

MSIMAMO KUNDI B:

 P   W  D   L    GF GA GD Pts

Burundi         1    1    0    0    5    1    4    3

Tanzania       1    1    0    0    2    0    2    3

Sudan             1    0    0    1    0    2    -2  0

Somalia         1    0    0    1    1    5    -4  0

MSIMAMO KUNDI C:

 P   W  D   L    GF GA GD Pts

Rwanda         1    1    0    0    2    0    2    3

Eritrea            1    0    1    0    0    0    0    1

Zanzibar        1    0    1    0    0    0    0    1

Malawi          1    0    0    1    0    2    -2  0

VIWANGO VYA UBORA FIFA

NCHI                  NAFASI

Uganda             86

Malawi              101

Ethiopia            102

Sudan                102

Rwanda             122

Burundi             128

Kenya                130

Tanzania           134

Zanzibar            134

Somalia             193

Eritrea               192

Sudan Kusini    200

(Viwango hivi vimetoka mwezi huu)

Tuesday, November 27, 2012