AZAM FC NA SINGIDA BLACK STARS ZATINGA 16 BORA KOMBE LA CRDB

TIMU ya Azam FC imefanikiwa kwenda Hatua ya 16 Bora Kombe la Shirikisho la Soka Tanzania (TFF), michuano inayodhaminiwa na Benki ya CRDB baada ya ushindi wa mabao 1-0 dhidi ya Mbeya Kwanza usiku huu Uwanja wa Azam Complex, Chamazi Jijini dar es Salaam.
Bao pekee la Azam FC, moja ya timu tishio za Ligi Kuu ya NBC Tanzania Bara lililoitupa nje Mbeya Kwanza inayoshiriki Ligi ya Championship limefungwa na winga Iddi Suleiman Ally 'Nado' dakika ya 11 akimalizia kazi nzuri ya beki wa kulia, Nathaniel Raphael Chilambo.

Nayo Singida Black Stars imefanikiwa kwenda Hatua ya 16 Bora Kombe la CRDB kwa ushindi wa mabao 3-1 dhidi ya Songea United leo Uwanja wa Mwigulu Airtel Complex mkoani Singida.
Mabao ya Singida Black Stars yamefungwa na  mshambuliaji Mkenya, Elvis Rupia, kiungo Mghana, Emmanuel Kwame Keyekeh kwa penalti na mshambuliaji mwingine, Muivory Coast, Joseph Gnadou Guede.

Nayo Mbeya City imeitoa Bandari FC kwa kuichapa 3-0 mabao ya Vitalis Mayanga dakika ya 16 na 55 na Riphat Msuya dakika ya  76 Uwanja wa Sokoine Jijini Mbeya. 

Ilikuwa siku mbaya kwa timu mbili za Ligi Kuu, Tanzania Prisons na Mtibwa Sugar ambazo zimetolewa na timu za Championship kwa vipigo vinavyofanana nyumbani, 1-0 zote.

Mtibwa Sugar imefungwa 1-0 na Mbuni FC ya Arusha bao la Omary Athumani dakika ya 33 Uwanja wa Jamhuri, Dodoma, wakati Tanzania Prisons imefungwa 1-0 na TMA Stars ya Arusha pia bao la Ernest Baltazari dakika ya 39 Uwanja wa Halmashauri ya Wilaya Chunya Jijini Mbeya.

MATOKEO YOTE 32 BORA KOMBE LA CRDB

Azam FC 1-0 Mbeya Kwanza

Yanga SC 7-1 Polisi Tanzania

Singida Black Stars 3-1 Songea United

Mbeya City 3-0 Bandari FC

Mtibwa Sugar 0-1 Mbuni FC

Tanzania Prisons 0-1 TMA Stars

Fountain Gate 2-1 Gunners FC

Coastal Union 4-1 Stand United

Simba Sc 2-0 B19 FC

Namungo FC 4-1 Kagera Sugar

Pamba Jiji FC 2-1 Transit Camp

Geita Gold 4-1 Nyika FC

Mashujaa FC 0-0 KegGold (Penalti 5-3)

JKT Tanzania 2-0 Hausang FC

TRA United 4-0 Kijiwe Nongwa 

Dodoma Jiji 2-0 African Sports

Sunday, March 08, 2026