• HABARI MPYA

    Friday, January 04, 2019

    MAKAMBO AWA MCHEZAJI BORA, ZAHERA KOCHA BORA LIGI KUU DESEMBA 2018

    Na Mwandishi Wetu, DAR ES SALAAM
    MSHAMBULIAJI wa timu ya Yanga ya Dar es Salaam, Heritier Makambo amechaguliwa kuwa Mchezaji Bora wa mwezi Desemba wa Ligi Kuu Tanzania Bara (TPL) msimu wa 2018/2019. 
    Makambo raia wa Jamhuri ya Kidemokrasia ya Congo (DRC), alitwaa tuzo hiyo baada ya kuwashinda wenzake wawili,  Miraji Athumani wa Lipuli ya Iringa na Idd Selemani wa Mbeya City alioingia nao fainali katika uchambuzi uliofanywa Dar es Salaam wiki hii na Kamati ya Tuzo ya TPL inayotolewa na Shirikisho la Mpira wa Miguu Tanzania (TFF). 
    Kwa mwezi huo wa Desemba, Yanga ilicheza michezo mitano, ambapo Makambo alitoa mchango mkubwa kwa Yanga kupata pointi 15   ikishinda michezo yote mitano iliyocheza, huku mshambuliaji huyo akitoa mchango mkubwa kwa timu yake ikiwa ni pamoja na kufunga mabao manne na Yanga kupanda kutoka nafasi ya pili hadi ya kwanza katika msimamo wa ligi inayoshirikisha timu 20. 
    Heritier Makambo (kushoto) amechaguliwa kuwa Mchezaji Bora wa Ligi Kuu ya Bara mwezi Desemba 

    Kwa upande wa Miraji Athumani alikuwa na mchango mkubwa katika mafanikio ya timu ya Lipuli kwa mwezi huo, ambapo timu yake ilicheza michezo minne ikishinda mitatu na kutoka sare mmoja ikijikusanyia pointi 10 na kupanda kutoka nafasi ya 14 hadi ya nane, huku Idd Selemani naye alionesha uwezo wa hali ya juu kwa timu yake ya Mbeya City kwa mwezi huo. 
    Pia Kamati ya Tuzo, imemchagua Kocha wa Yanga, Mwinyi Zahera kuwa Kocha Bora wa mwezi Desemba  akiwashinda Kocha Mkuu wa Lipuli, Samuel Moja na Kocha Mkuu wa Kagera Sugar Mecky Maxime aliongia nao fainali. 
    Zahera aliiongoza timu yake katika michezo minne kati ya mitano iliyocheza, ambayo Yanga ilishinda michezo yote mitano na kuvuna pointi 15 hivyo kukaa kileleni mwa msimamo wa ligi ikipanda kutoka nafasi ya pili. 
    Kwa upande wa Moja yeye aliiongoza timu yake katika michezo yote minne iliyocheza ikishinda mitatu na kutoka sare mmoja, wakati Maxime aliiongoza Kagera Sugar katika michezo yote mitatu iliyocheza ikishinda miwili na kutoka sare mmoja. 
    TFF ina utaratibu wa kuwazadiwa wachezaji bora wa kila mwezi, huku pia mwisho wa msimu kukiwa na tuzo mbalimbali zinazohusu ligi hiyo, ambapo msimu wa mwaka 2017/2018 kulikuwa tuzo 16 zilitolewa kwa washindi wa kada mbalimbali, ambapo kwa ushindi huo Makambo atazawadiwa tuzo, king’amuzi kutoka Azam na Sh milioni moja. 
    Washindi wengine wa tuzo hiyo kwa msimu huu na miezi yao katika mabano ni mshambuliaji wa Simba, Meddie Kagere (Agosti), mshambuliaji wa Mbeya City, Eliud Ambokile, mshambuliaji wa Simba Emmanuel Okwi (Oktoba) na Makambo (Novemba). 
    Kwa upande wa makocha walioshinda tuzo hizo kwa msimu huu ni Amri Said wa Mbao FC (Agosti), Mwinyi Zahera wa Yanga (Septemba), Hans Pluijm wa Azam (Oktoba) na Zahera (Novemba). 
    Loading...
    • Blogger Comments
    • Facebook Comments

    0 comments:

    Item Reviewed: MAKAMBO AWA MCHEZAJI BORA, ZAHERA KOCHA BORA LIGI KUU DESEMBA 2018 Rating: 5 Reviewed By: Bin Zubeiry Sports - Online

    PATA HABARI POPOTE ULIPO. ZIKITUFIKIA ZITAKUFIKIA

    Scroll to Top