• HABARI MPYA

    Tuesday, March 21, 2017

    HIMID, MKUDE MANAHODHA WAPYA TAIFA STARS

    Na Princess Asia, DAR ES SALAAM
    KOCHA Mkuu wa timu ya soka ya taifa ya Tanzania, Salum Mayanga amewateua viungo Himid Mao Mkami wa Azam FC na Jonas Gerald Mkude wa Simba, kuwa Manahodha wasaidizi wa timu hiyo.
    Uteuzi unafuatia aliyekuwa Nahodha Msaidizi na Nahodha wa kikosi cha wachezaji wa nyumbani, John Raphael Bocco ‘Adebayor’ kuwa majeruhi tangu Januari mwaka huu.
    Akizungumza na Bin Zubeiry Sports – Online leo mjini Dar es Salaam, Ofisa Habari wa Shirikisho la Soka Tanzania (TFF), Alfred Lucas alisema kwamba Mayanga ataendelea kumtumia mshambuliaji wa KRC Genk, Mbwana Ally Samatta kama nahodha mkuu.
    Himid Mao wa Azam FC atakuwa nahodha Msaidizi wa Taifa Stars pamoja na Jonas Mkude wa Simba 

    “Mabadiliko hayo yamefanyika kwa wasaidizi pekee, hivyo Samatta ataendelea na majukumu yake katika mechi za AFCON, Kombe la Dunia na za kirafiki za kimataifa, wakati Mkude na Mao watakuwa Manahodjha wa kikosi cha CHAN,” alisema Lucas.
    Samatta anatarajiwa kuwasili nchini usiku wa leo kuanzia Saa 4:00 usiku, wakati winga wa Tenerife ya Hispania atawasili Alhamisi.
    Taifa Stars inatarajiwa kucheza mechi mbili, kwanza na Botswana Machi 25 na baadaye Burundi Machi 28, mwaka huu Uwanja wa Taifa mjini Dar es Salaam na pamoja na Samatta, mchezaji mwingine wa Tanzania anayecheza Ulaya, Farid Mussa anatarajiwa pia kuwasili leo.
    Kikosi kamili cha Stars kwa ajili ya mechi hizo, ambacho kimeingia kambini hoteli ya Urban Rose, Dar es Salaam kinaundwa na makipa; Aishi Manula (Azam FC), Deogratius Munishi (Yanga SC) na Said Mohammed (Mtibwa Sugar).
    Walinzi wa pembeni upande wa kulia aliwataja Shomari Kapombe (Azam FC) na Hassan Kessy (Yanga SC) wakati upande wa kushoto wapo Mohammed Hussein (Simba) na Gadiel Michael (Azam FC).
    Walinzi wa kati Vicent Andrew (Yanga SC), Salim Mbonde (Mtibwa Sugar), Abdi Banda (Simba SC) na Erasto Nyoni (Azam FC) ilihali aliwataja viungo wa kuzuia kuwa ni Himid Mao (Azam FC) na Jonas Mkude (Simba SC).
    Kadhalika wako viungo wa kushambulia Salum Abubakar (Azam FC), Said Ndemla (Simba SC), Frank Domoyo (Azam FC) na Muzamil Yassin (Simba) wakati viungo wa kulia waliotajwa ni Simon Msuva (Yanga SC) na Shizza Kichuya (Simba SC).
    Viungo wa kushoto ni Farid Mussa (Teneriffe, Hispania) na Hassan Kabunda (Mwadui FC) wakati washambuliaji ni Samatta (KRC Genk- Ubelgiji), Ibrahim Hajib (Simba SC), Mbaraka Yussuf (Kagera Sugar) na Abdul-Rahman Mussa (Ruvu Shooting).
    Mayanga anasaidiwa kocha wa Makipa, Patrick Mwangata; Meneja wa timu, Danny Msangi; Mtunza Vifaa, Ally Ruvu wakati Daktari wa timuatakuwa Richard Yomba huku Daktari wa viungo akiwa ni Gilbert Kigadya.
    • Blogger Comments
    • Facebook Comments

    0 comments:

    Post a Comment

    Note: Only a member of this blog may post a comment.

    Item Reviewed: HIMID, MKUDE MANAHODHA WAPYA TAIFA STARS Rating: 5 Reviewed By: BIN ZUBEIRY SPORTS - ONLINE

    PATA HABARI POPOTE ULIPO. ZIKITUFIKIA ZITAKUFIKIA

    Scroll to Top